ताप्लेजुङको उच्च हिमाली भेगमा हिमपात

-उज्यालो पोष्ट
ताप्लेजुङ, चैत ८ । मंगलबार रातिदेखि सुरु भएको वर्षासँगै ताप्लेजुङको उच्च हिमाली भेगमा हिमपात भएको छ । उच्च हिमाली भेगअन्तर्गत रहेको बस्ती फक्ताङ्लुङ गाउँपालिका–६ लेलेपको घुन्सा, फले र वडा ७ ओलाङ्चुङगोला सहितका क्षेत्रमा हिमपात भएको हो ।
जिल्ला प्रहरी कार्यालय ताप्लेजुङका सूचना अधिकारी एवम् प्रहरी निरीक्षक कमलकुमार लुंगेलीका अनुसार घुन्सामा आधा फिटभन्दा कम अर्थात चार इन्च जति हिउँ परेको छ । उहाँले फले, याङमा र ओलाङ्चुङगोला बस्तीसम्म नै सामान्य हिमपात भएको जानकारी दिनुभयो । हिमाली भेगका बस्तीहरुमा बुधबार अपराह्नदेखि हिमपात सुरु भएको स्थानीयले बताएका छन् ।
फलेकी स्थानीय फुटी शेर्पाका अनुसार अपराह्नदेखि सुरु भएको हिमपात बिहीबार बिहानसम्म जारी रहेको छ । बस्तीसम्म नै सामान्य हिउँ परेपछि चिसो निकै बढेको शेर्पाले बताउनुभयो । उहाँकाअनुसार बस्ती नजिक माथिल्लो भेगका डाँडाहरुमा सेताम्मे हिउँ परेको छ । ओलाङ्चुङगोलाकी दावाफुटी शेर्पाले पनि गोला बस्तीसम्म नै वर्षासँगै हिउँ परेको जानकारी दिनुभयो । बिहान बिहान अझ बाक्लो हिउँ परेको स्थानीय तेन्जिङ वालुङले जानकारी दिनुभयो । वर्षा र हिमपात भएपछि ओलाङ्चुङगोलामा चिसो पनि निकै बढेको स्थानीयले बताएका छन् ।
ओलाङ्चुङगोलाकै अर्को हिमाली बस्ती याङमा पनि हिउँ परेको स्थानीय ताम्लिङ शेर्पाले बताउनुभयो । याङमा चार हजार २०० मिटर उचाइ भएको जिल्लाकै उच्च हिमाली बस्ती पनि हो । याङमाबाहेक ओलाङ्चुङगोला, घुन्सा र फले बस्ती पनि तीन हजार २०० मिटरभन्दा बढी उचाइ रहेको हिमाली बस्तीहरु हुन् ।
यस्तै तीन हजार ७९४ मिटर उचाइ रहेको प्रसिद्ध तीर्थस्थल पाथीभरामा पनि बाक्लो हिमपात भएको पाथीभरा क्षेत्र विकास समितिका कार्यकारी निर्देशक प्रजिन हाङ्बाङले जानकारी दिनुभयो । उच्च हिमाली भेगहरुमा हिमापत भएपछि सदरमुकाम फुङ्लिङ बजारसहित जिल्लामा तुलनात्मक रुपमा चिसो निकै बढेको छ ।
यता सामान्य पानी पर्ने क्रम जारी रहेकाले थप हिमपात हुने सम्भावना रहेको स्थानीय बताउँछन् । जल तथा मौसम विज्ञान फिल्ड कार्यालयका अनुसार ताप्लेजुङमा बुधबार ८.५ मिलिमिटर वर्षा भएको छ । ओलाङ्चुङगोलामा परेको हिउँ, तस्बिर सौजन्य- तेन्जिङ वालङ