वनमा लागेको डढेलोले दोखुमा चार घर जल्यो
-उज्यालो पोष्ट
ताप्लेजुङ, चैत ४ । ताप्लेजुङको फुङ्लिङ नगरपालिकामा वनमा लागेको डढेलोले चार वटा जलेर नस्ट भएको छ । प्रहरीकाअनुसार फुङ्लिङ नगरपालिका–८ दोखुमा वनमा लागेको डढेलोले आइतबार चारवटा घर जलेर नस्ट भएको हो ।
वनमा लागेको डढेलोले दोखुका स्थानीय नरहरि पौडेल र डिल्ली पौडेलको घर जलेर नस्ट भएको छ । नरहरि र डिल्ली पौडेलको घर आइतबार (आज) दिउँसो करिव ५ बजेतिर जलेको स्थानीय अमर विकले जानकारी दिनुभयो । उहाँका अनुसार सोही डढेलोले बिहान स्थानीय पार्वता विश्वकर्माको दुई वटा घर जलेर नस्ट भएको छ ।
घर नजिकको वनमा लागेको डढेलोले चार घरमा आगलागी भएको र क्षतिको विवरण भने आउन बाँकी रहेको जिल्ला प्रहरी कार्यालय ताप्लेजुङका सूचना अधिकारी एवम् प्रहरी निरीक्षक कमलकुमार लुंगेलीले जानकारी दिनुभयो । जिल्ला प्रहरी कार्यालयबाट प्रहरी टोली घटनास्थलतर्फ गएको र सो टोली फर्केपछि मात्र क्षतिको विवरण आउने लुंगेलीले बताउनुभयो ।
