मैवाखोला गाउँपालिकाले स्थानीयलाई दियो पचास प्रतिशत र्मुरा प्रजातिको राँगा

ताप्लेजुङ,माघ २८ । ताप्लेजुङको मैवाखोला गाउँपालिकाले भैंसी तथा राँगाको नस्ल सुधारका लागि उन्नत प्रजातिको राँगा बितरण गरेको छ ।

मैवाखोला गाउँपालिकाका प्रवक्ता तथा वडा नं १ का वडाध्यक्ष चन्द्र तामाङका अनुसार ५० प्रतिशत र्मुरा प्रजातिको राँगा स्थानीय कृषक समूहलाई हस्तान्तरण गरिएको छ । तामाङका अनुसार स्थानीय साँझ बिहान कृषि तथा पशुपन्छी फर्मलाई ५० प्रतिशत र्मुरा प्रजातिको राँगा हस्तान्तरण गरिएको छ । पालिकाले सो फर्मका प्रोपाईटर दिनेश वनेमलाई आईतवार र्मुरा प्रजातिको राँगा हस्तान्तरण गरेको जनाएको छ ।

भैंसी तथा राँगाको नस्ल सुधार गरी व्यवसायिक पशुपालन,दुध र मासु उत्पादनमा बृद्धि गरी स्थानीय समुदायको जीवस्तरमा सुधार ल्याउन पालिकाले चालू आर्थिक बर्ष २०८०।८१ को बजेटमा उन्नत प्रजातिको नस्ल सुधारका गर्न बजेट बिनियोजन गरेको थियो । सोहि बजेटबाट र्मुरा प्रजातिको राँगा समूहमार्फत समुदायमा पुग्ने गरी बितरण गरिएको पालिकाले जनाएको छ ।