पालिकाको ‘लिडर’ बिद्यालय बन्यो आठराई त्रिवेणी गाउँपालिकास्तरीय राष्ट्रपति रनिङ शिल्डको बिजेता

खगेन्द्र अधिकारी
ताप्लेजुङ,पुस २८ । ताप्लेजुङको आठराई त्रिवेणी गाउँपालिकास्तरीय राष्ट्रपति रनिङ शिल्ड प्रतियोगितामा पालिकाको ‘लिडर’ बिद्यालय सरस्वती मावि हाङपाङ पहिलो भएको छ ।

सरस्वती मावि नमूना मावि हो । पालिकाको वडा नं २ फुलवारी महभीर खेल मैदानमा भएको प्रतियोगितामा चाँगे मावि चाँगे दोस्रो हुँदा दुर्गा मावि फुलवारी तेस्रो भएको पालिकाका प्रमुख प्रशासकीय अधिकृत भक्तबहादुर भट्टराईले जानकारी दिनुभयो । उहाँका अनुसार बिभिन्न १८ बिधामा भएका खेलकुद प्रतियोगितामा आठराई त्रिबेणीका ७ वटा माध्यमिक बिद्यालयले स्पर्धा गरेका थिए । प्रतियोगितामा बिजेता खेलाडीहरुलाई पालिका अध्यक्ष दीपेन्द्र पोमू(दीपेन),उपाध्यक्ष शान्ताकुमारी आङ्बुहाङ,प्रमुख प्रशासकीय अधिकृत भट्टराई,पालिकाका ५ वटै वडाका वडाध्यक्षहरु,कार्यपालिका सदस्य,पालिकाका बिद्यालयका प्रधानाध्यापक एवम् प्रतिनिधि तथा गाउँसभा सदस्यहरुको उपस्थिति पुरस्कार तथा प्रमाणपत्र बितरण गरिएको छ ।

पालिका स्तरीय राष्ट्रपति रनिङ शिल्ड प्रतियोगिताका बिजेताहरुलाई बधाई सहित सहभागी सबैलाई पालिका अध्यक्ष पोमूले आभार व्यक्त गर्नु भएको छ । यसअघि प्रतियोगिताको उद्घाटन कोशी प्रदेश सरकारका पूर्व मन्त्री एवम् प्रदेशसभा सदस्य तिलकुमार मेन्याङ्वोले उद्घाटन गर्नु भएको थियो । उद्घाटनका अवसरमा प्रमुख जिल्ला अधिकारी हीरादेवी पौडेल सहित सुरक्षा निकायका प्रमुखहरु,जिल्ला खेलकुद विकास समितिका अध्यक्ष नरेन्द्र(गणेश)मावो सहितको उपस्थिति रहेको थियो ।