ताप्लेजुङका लागि माध्यमिक तहका शिक्षक सिफारिस

उज्यालो पोष्ट
ताप्लेजुङ, मङ्सिर १३ । खुला प्रतिस्पर्धाबाट छनोट भएका माध्यमिक तहका २३ जना शिक्षक ताप्लेजुङका लागि सिफारिस भएका छन् । विज्ञान, गणितलगायत विषयका उक्त सङ्ख्यामा शिक्षकहरु स्थायी नियुक्तिका लागि ताप्लेजुङमा सिफारिस भएका हुन् ।
शिक्षा विकास निर्देशनालय धनकुटाबाट यस जिल्लाका लागि सिफारिस भएका माध्यमिक तहका शिक्षकमध्ये सबैभन्दा बढी विज्ञान विषयका १२ जना रहेका छन् । त्यस्तै गणित विषयका आठ जना, सामाजिकका दुई र अङ्ग्रेजी विषयका एकजना शिक्षक सिफारिस भई आएका शिक्षा विकास तथा समन्वय इकाइ ताप्लेजुङले जनाएको छ ।
निर्देशनालयबाट ताप्लेजुङ सिफारिस भएका शिक्षकलाई स्थायी नियुक्तिका लागि स्थानीय तह रोज्न शिक्षा विकास तथा समन्वय इकाइले समय दिएको छ । समन्वय इकाइले सूचना जारी गर्दै आफूले चाहेको स्थानीय तह (ठाउँ) रोज्नका लागि सम्बन्धित शिक्षकले मङ्सिर १७ गते आइतबार सम्ममा निवेदन दिइसक्न उल्लेख गरेको छ ।
इकाइ प्रमुख योगेश्वर भट्टराईका अनुसार जिल्लाको नौवटै स्थानीय तहलाई शिक्षक कोटा (सङ्ख्या) विभाजन गरिएको र सो अनुसार शिक्षकले निवेदन दिनुपर्ने भएको छ । भट्टराईले सम्बन्धित स्थानीय तहमा विषय शिक्षक आवश्यकता रहेको आधारमा कोटा विभाजन गरिएको जानकारी दिनुभयो । शिक्षकहरुले ठाउँ रोजेपछि सोअनुसार सम्बन्धित स्थानीयका विद्यालयमा नियुक्तिको प्रक्रिया अघि बढाइने उहाँको भनाइ छ ।
शिक्षा विकास तथा समन्वय इकाइले गरेको कोटा विभाजनअनुसार मैवाखोला गाउँपालिकाका लागि गणित विषयका तीन जना र विज्ञान विषयका एकजना शिक्षक रहेका छन् । यस्तै फक्ताङ्लुङ गाउँपालिकालाई गणित शिक्षक एक, विज्ञान दुई र सामाजिक विषयका शिक्षक एकजना रहेको छ । मिक्वाखोला गाउँपालिकाका लागि गाणित शिक्षक एक र विज्ञान विषयका दुई जना, सिरिजंघा गाउँपालिकालाई गाणित एक, विज्ञान दुई र सामाजिक विषयका शिक्ष्क एक जना रहेको छ ।
त्यस्तै फुङ्लिङ नगरपालिकाका लागि विज्ञान शिक्षक दुई जना, मेरिङ्देन गाउँपालिकालाई विज्ञान शिक्षक एकजना, आठराई त्रिबेणी गाउँपालिकालाई गणित शिक्षक एकजना रहेको छ । यसैगरी सिदिङ्वा गाउँपालिकालाई गणित शिक्षक एक, विज्ञान एक र पाथीभरा याङ्वरक गाउँपालिकाका लागि विज्ञान शिक्षक एकजना तथा अङ्ग्रेजी विषयका शिक्षक एकजना रहनेगरी कोटा निर्धारण गरिएको छ ।