यसवर्ष पनि रिड नेपालमार्फत ताप्लेजुङका ७ जनाले पाए छात्रवृत्ति, छात्रवृत्तिमै साढे ६४ लाख रुपैयाँ बढी बितरण
खगेन्द्र अधिकारी
ताप्लेजुङ,मंसिर ६ । ताप्लेजुङको दुर्गम र हिमाली क्षेत्रबाट उच्च शिक्षा अध्ययन गर्ने जेहेन्दार बिद्यार्थीलाइ दिइदै आएको जर्ज वैण्ड मेमोरियल छात्रबृति शैक्षिक सत्र २०८०।८१ का लागि ७ जनालाइ बितरण गरिएको छ ।
सन् २०१३ मा स्थापना गरिएको छात्रबृत्ति यो सहित अहिले सम्म ८७ जनालाई प्रदान गरिएको ग्रामीण शिक्षा तथा वातावरण विकास केन्द्र(रिड)नेपालका ताप्लेजुङ प्रवन्धक राजेन्द्र पन्तले जानकारी दिनुभयो । रिड नेपालका शिक्षा विकास अधिकृत रोमा मावो लिम्बूका अनुसार यसबर्ष बितरण गरिएको छात्रबृत्ति ७ लाख ५७ हजार रुपैयाँ बराबरको रहेको छ । बिगत ११ बर्ष दखि नियमित रुपमा प्रदान गर्दै आएको यस्तो छात्रबृत्तिमामात्र रिड नेपालले ६४ लाख ५६ हजार ६८ रुपैयाँ खर्च गरिसकेको रिड नेपालका वित्त तथा प्रशासन प्रमुख तेजप्रकाश उपाध्यायले जानकारी दिनुभयो ।
रिडका जिल्ला कार्यक्रम प्रवन्धक पन्तका अनुसार तीनबर्षे हेल्थ असिष्टेन्टतर्फ फक्ताङ्लुङ गाउँपालिका वडा नं ६ लेलेपका दावाकिपा शेर्पाले १ लाख ८० हजार रुपैयाँ छात्रबृत्ति पाउनु भएको छ । फक्ताङ्लुङ गाउँपालिका वडा नं ५ तापेथोकका मुक्साम लिम्बूले तीनबर्षे हाईड्रो ईञ्जिनियरिङतर्फ १ लाख ८० हजार रुपैयाँनै छात्रबृत्ति पाउँदा दुईबर्षे विज्ञान संकायमा फुङलिङ नगरपालिका वडा नं ४ का प्रवेश खतिवडा,सिरिजङ्गा गाउँपालिका वडा नं ७ खेवाङका रिसव खत्री र फक्ताङ्लुङ गाउँपालिका वडा नं ६ लेलेपका दीपक लिम्बूले समान ८४–८४ हजार रुपैयाँ छात्रबृत्ति पाउनुभयो ।
शिक्षा संकायतर्फ फक्ताङ्लुङ गाउँपालिका वडा नं ४ इखाबुका आयुषा लिम्बू र सिरिजङ्गा गाउँपालिका वडा नं ७ खेवाङका सनिका इम्बुङ लिम्बूले समान ७२ हजार रुपैयाँ बराबरको छात्रबृत्ति पाएका छन् । अध्ययन गर्न लाग्ने बर्ष सम्म नै रिड नेपालले छात्रबृति प्रदान गरिरहने प्रावधान अनुसार कसैले २ बर्ष र कसैले ३ बर्ष सम्मनै छात्रबृति रकम पाउने रिड नेपालका जिल्ला कार्यक्रम प्रवन्धक पन्तले जानकारी दिनुभयो ।
स्थानीय स्तरमा प्राविधिक जनशक्ति अभाव भइरहेको अवस्थालाइ मध्यनजर गर्दै कार्यक्षेत्र भित्रका जेहेन्दार बिद्यार्थीले पाउने छात्रबृत्ति प्राविधिक बिषय अध्ययन गर्नेहरुलाइ बितरण गरिएको रिड नेपालले जनाएको छ । फक्ताङ्लुङ गाउँपालिकाको इखाबु,लेलेप,तापेथोक,ओलाङ्चुङगोला तथा सिरिजङ्घा गाउँपालिकाको याम्फुदिन,खेवाङ र मामाङ्खेलाइ रिड नेपालले आफ्नो कार्यक्षेत्र मानेको छ ।
हिमालयन ट्रष्ट युकेको आर्थिक सहयोगमा नेपालका दुर्गम र हिमाली क्षेत्रहरुको शैक्षिक प्रवद्र्धनका लागि रिड नेपालले काम गर्दै आएको छ । जर्ज वैण्ड तिनको नाम हो,जसले विश्वको तेस्रो अग्लो शिखर कञ्चनजंघा हिमालमा पहिलो पटक मानव पाइला राखेका थिए । हिमालयन ट्रष्ट युके तिनै जर्ज वैण्डको संस्थापन र अगुवाइबाट सुरु भएको अन्तराष्ट्रिय गैर सरकारी संस्था हो । जर्ज वैण्ड भने दिवंगत भइ सकेका छन् । रिड नेपाल हिमालयन ट्रष्ट युकेको आर्थिक व्यवस्थापनबाट चलिरहेको छ ।
