पुस्तकालय दिवसको अवसरमा फुङलिङमा अन्तरक्रिया र साहित्य वाचन

ताप्लेजुङ,भदौ १५ । १६ औं पुस्तकालय दिवसको अवसरमा शुक्रवार ताप्लेजुङको फुङलिङ नगरपालिका वडा नं ७ स्थित बृद्ध चौतारीको सभाहलमा अन्तरक्रिया तथा रचना वाचन कार्यक्रम सम्पन्न भएको छ ।

तोक्मेडाँडास्थित बिद्युत बितरण केन्द्र नजिकै स्थापना भएको बृद्ध चौतारी कक्षमा दीपज्योति सामुदायिक पुस्तकालय स्थापना भएको छ । दीपज्योति सामुदायिक सिकाई केन्द्रद्धारा आयोजित अन्तरक्रिया तथा रचनावाचन कार्यक्रममा पुस्तकालयको दिगो संरक्षण र स्थायित्वका लागि सरोकारवाला पक्षले खेल्नुपर्ने भूमिका केन्द्रित छलफल भएको केन्द्रका अध्यक्ष भरतकुमार गुरुङले जानकारी दिनुभयो । फुङलिङ नगरपालिकाका यसअघिकै निर्वाचित जनप्रतिनिधिको अगुवाईमा निर्माण सुरु भएको बृद्ध चौतारी अहिलेको कार्यकालका लागि निर्वाचित जनप्रतिनिधिहरुको सक्रियतामा पूरा भएको छ ।

कार्यक्रममा बिभिन्न साहित्य स्रष्टाहरुले आ–आफ्नो रचना वाचन समेत गर्नु भएको कञ्चनजंघा साहित्यिक प्रतिष्ठानका अध्यक्ष कमलप्रसाद भट्टराईले जानकारी दिनुभयो । कार्यक्रममा फुङलिङ नगरप्रमुख अमिर मादेन,साहित्य क्षेत्रमा अग्रज तथा ताप्लेजुङका सहायक प्रमुख जिल्ला अधिकारी टंकबहादुर भट्टराई,शिक्षा विकास तथा समन्वय ईकाई ताप्लेजुङका प्रमुख योगेश्वर भट्टराई,फुङलिङ नगरपालिका वडा नं ७ का वडाध्यक्ष योगेन्द्र निरौला,फुङलिङ नगरपालिकाका शिक्षा अधिकृत प्रकाश पौडेल,भानुजन माविका प्रधानाध्यापक किशोरकुमार राई सहितको उपस्थिति रहेको थियो ।