भदौ १४ गतेबाट ताप्लेजुङमा हुने पाथीभरा गोल्डकपमा ८ वटा टीम सहभागी हुने,निरन्तरको झरीकाबीच तयारी तीव्र

खगेन्द्र अधिकारी
ताप्लेजुङ,भदौ ८ । भदौ १४ गते देखि ताप्लेजुङमा हुने पाथीभरा गोल्डकपमा ८ वटा टीम सहभागी हुने भएका छन् । ताप्लेजुङको जिल्लाको खेल टिमको प्रतिनिधित्व मानभरा फुटबल क्लवले गर्ने भएको छ ।‘ज्यादै बडी टिमले प्रतियोगितामा सहभागिताका लागि आग्रह गरेपनि ८ वटा टिमलाई मात्र सहभागी गराउन सक्ने निक्र्यौल भएको छ’लाखेजात्रा खेल सञ्चालन समितिका अध्यक्ष देवराज गुरुङले भन्नुभयो । उहाँका अनुसार प्रतियोगितालाई अनिवार्य सञ्चालन गर्नुका पछि ४ मुख्य कारण छन् । फुटबल क्षेत्रमा नयाँ प्रतिभा पहिचान गर्न,अग्रज खेलाडीहरुको योगदानको स्मरण गर्न,बजार क्षेत्रलाई आर्थिक रुपले चलायमान बनाउन र खेलकुदका माध्यमबाट पर्यटन प्रवद्र्धन गर्न प्रतियोगितालाई निरन्तरता दिनु अनिवार्य रहेको निश्कर्ष आफुहरुले निकालेको गुरुङले जानकारी दिनुभयो । लाखेजात्राको अवसरमा हुने प्रतियोगिता भदौ १४ गतेबाट सुरु भई सातादिन सम्ममा सम्पन्न गर्ने योजना बनाईएको लाखेजात्रा सञ्चालन समितिले जनाएको छ ।
करिव ५ हजार अट्ने अस्थायी प्याराफिट बन्यो
निरन्तरको झरी र कुहिरिदो मौसमका बाबजुद पनि खेल सञ्चालनस्थल भानुजन माविको खेल मैदानमा करिव ५ हजार मानिस अट्ने प्याराफिटको निर्माण कार्य पूरा भएको आयोजक संस्थाले जनाएको छ । आयोजकले करिव १५ हजार दर्शक अट्ने अस्थायी प्याराफिट निर्माणको तयारी गरेको छ । सबै क्षेत्रमा गरी १८ हजार देखि २० हजार दर्शकले प्याराफिटमै बसेर फुटबल हेर्न पाउने व्यवस्थाको तयारी गरिएको छ । सञ्चार संस्थाहरुलाई प्रत्यक्ष प्रसारणका लागि छुट्टै कक्ष मिलाईने भएको छ ।
निरन्तरको झरी तयारीका लागि बाधक
३ बर्ष देखि लगातार हुन नसकेकको प्रतियोगितालाई निरन्तरता दिनेगरी आयोजक समिति पुर्नगठन गर्दा तयारी अवधि करिव दुईसाता मात्र थियो । आयोजक समितिले जिम्मेवारी पाएकै दिनबाट तीव्रगतिले काम गरिरहेको छ । तर निरन्तरको झरीले तयारीका सबै गतिविधिमा उल्झन सृजना गरेको छ ।‘एक त मैदान पनि नयाँ माटो फिलिङ सहितका कारणले यसै पनि हिलाम्मे,अर्कोतर्फ निरन्तरको बर्षा’तयारीको तीव्रतामा देखिएको समस्या बारे बताउँदै लाखेजात्रा खेल सञ्चालन समितिका अध्यक्ष गुरुङले भन्नुभयो । उहाँले जसरी भएपनि प्रतियोगिता सम्मपन्न गरेरै छाड्ने प्रतिबद्धता जनाउँदै झरीको वास्ता नगरी समितिले प्रतियोगिताको तयारीका चरणलाई कम हुन नदिनेगरी काम गरिरहेको जानकारी दिनुभयो ।
४७ लाखको लागत अनुमान
प्रतियोगिता सम्पन्न गर्न आयोजक समितिले करिव ४७ लाख रुपैयाँको लागत अनुमान गरेको छ । समिति अध्यक्ष गुरुङले प्रतियोगिताको उप बिजताले पाउने नगद पुरस्कारको प्रायोजन प्रतिबद्धता आई सकेको र सहयोगी दाताहरुले समेत सहयोगको प्रतिबद्धता जनाउँदै आएको जानकारी दिनुभयो । उहाँका अनुसार फुङलिङ नगरपालिकाले प्रतियोगिताका लागि ५ लाख रुपैयाँ सहयोग गर्ने प्रतिबद्धता जनाएको छ । यस्तै ताप्लेजुङका बाँकी ८ स्थानीय तहले कम्तिमा १ लाख रुपैयाँको दरले सहयोग गर्न सक्ने आयोजक समितिको बुझाई रहेको छ । नगरपालिका र आसपासका वडाहरुबाट १५ लाख रुपैयाँ सहयोग जुट्ने आयोजक समितिको बुझाई छ । टिकट बिक्रीबाट २० लाख र बहुराष्ट्रिय कम्पनीहरुबाट ५ देखि ७ लाख रुपैयाँ सम्म संकलन गर्न सकिने आयोजक समितिले बिश्वास राखेको छ । अहिले सम्मको प्रतिबद्धताका आधारमा दाताहरुबाट ५ देखि ७ लाख रुपैयाँ संकलन गर्ने गरी आयोजक समितिले बिश्वास लिएको छ ।