ताप्लेजुङ प्रशासनको सार्वजनिक सुनुवाई ः सरकारी गाडीको दुरुपयोग रोक्ने देखि कर्मचारीको नम्र व्यवहार हुनुपर्ने सवाल उठ्यो,प्रजिअ

खगेन्द्र अधिकारी
ताप्लेजुङ,साउन ९ । सेवाग्राहीले जिल्ला प्रशासन कार्यालय ताप्लेजुङलाई बृद्धबृद्धा र अपाङ्गता भएका नागरिकको सेवाका लागि बिशेष सेवा क्षेत्र छुट्टयाउन सुझाव दिएका छन् ।

लामो समय सम्म लाइनमा बस्नुपर्ने र बृद्धबृद्धा तथा अपाङ्गता भएका नागरिकले अरु सरहनै सेवा लिनुपर्ने अवस्थाको अन्त्य गर्न उनीहरुको सुझाव रहेको छ । सार्वजनिक सेवा प्रवाह सम्वन्धी गुनासा तथा सेवाग्राहीको राय सुझाव ग्रहण गर्न मंगलवार जिल्ला प्रशासन कार्यालय ताप्लेजुङले आयोजना गरेको सार्वजनिक सुनुवाईका क्रममा त्यस्तो सुझाव आएको हो । प्रमुख जिल्ला अधिकारी गोमादेवी चेम्जोङका अनुसार सार्वजनिक सेवा प्रवाहको अवस्था बुझ्न प्रशासन कार्यालयले सहजकर्तामार्फत सेवा लिन आएका र विगत ७ दिन यता सेवा लिएर फर्किएका सेवाग्राहीसंग सेवा सन्तुष्टीबारे नमूनागत सर्वेक्षण गरेको थियो । सार्वजनिक सुनुवाईका दिन उपस्थित सेवाग्राही र बितरित सेवाको प्रभावकारीताबारे संकलित नमूनागत सर्वेक्षणका क्रममा सेवाग्राहीले आफ्नो अभिमत प्रकट गरेका थिए ।

सेवाग्राहीले सेवा बितरणमा टोकन प्रणाली लागु गर्न,सोधपुछ कक्षमा जनशक्तिको अनिवार्य व्यवस्थापन गर्न,प्रतिक्षालय सुधार गर्न समेत सुझाव दिएको प्रशासन कार्यालयले बताएको छ । यस्तै सेवाग्राहीका गुनासा र राय सुन्न पाक्षिक रुपमा थोरै समयका लागि भएपनि सेवाग्राही–कार्यालय प्रमुख भेटघाट कार्यक्रमको आयोजना गर्न,प्रशासन कार्यालय परिसरमा फिल्टर सहितको खानेपानीको व्यवस्थापन गर्न समेत सेवाग्राहीले सल्लाह दिएका छन् । अधिकाँस सेवाग्राहीको सुझाव भने कार्यालयमा सेवा लिन आएका सेवाग्राहीलाई कर्मचारीले झर्कोफर्को नमानी नम्र भाषामा बोलेर सेवा दिनुपर्ने रहेको छ । उनीहरुले कागजात अपुग भएको वा प्रकृया नपुगेको बहानामा कर्मचारीबाट हुने गरेको गालीगलौज र झर्कोफर्कोले सेवाग्राहीमा नैरस्यता र भय सृजना हुने भएकोले‘मुस्कान’सहितको सेवालाई व्यवहारिक कार्यान्वयन गर्न पनि सुझाएका छन् ।

१० बजेलाई नै कार्यालय समय ठान्न,कार्यालय समय सुरु भएदेखि अन्त्य हुँदा सम्म सम्वन्धित फाँटका कर्मचारी नियमित रुपम उपस्थित हुन र काम छिटो छरितो सम्पादन गर्न समेत सेवाग्राहीको सुझाव रहेको छ । सेवाग्राहीले पहुँचका भरमा भित्रभित्रै काम हुने र बाहिर सेवा लिन लाइनमा बसेका मान्छेको सेवा बितरणमा अल्याङटल्याङ गर्ने प्रवृतिको अन्त्य गर्न समेत सुझाव दिएका छन् । केहि सेवाग्राहीले अहिले सम्मको सेवा बितरणको अवस्थाप्रति सन्तुष्टी जनाउँदै यस कार्यलाई निरन्तरता दिन समेत प्रशासन कार्यालयलाई आग्रह गरेका छन् । यस्तै जिल्ला प्रशासन कार्यालयको समन्वयमा नागरिकता सम्वन्धी सिफारिस तथा पञ्जीकरणका कार्यबारे पालिकाका वडाध्यक्ष तथा वडा सचिवहरुलाई अनुशिक्षण कार्यक्रम सञ्चालन गर्नुपर्ने माग समेत सार्वजनिक सुनुवाईका क्रममा उठेको छ ।

सेवाग्राहीबाट सरकारी गाडीको दुरुपयोग देखि सवारी अनुमति नभएका सरकारी गाडीको नियन्त्रण र नियमनका बारेमा जिज्ञासा राखिएको थियो । अटो गाडीको अनुमति र मोटरसाईकल र अटो गाडीमा क्षमता भन्दा बढी यात्रु राखेर कुदाएका बिषय पनि सार्वजनिक सुनुवाईका प्रश्न बने । सुरक्षा सम्बेदनशिलताका बिषय उठाउने प्रश्नकर्ताले सरकारी तथा सार्वजनिक सम्पत्ति माथि हुने क्षति न्यूनीकरण तथा अवाञ्छित गतिविधि नियन्त्रण गर्न प्रहरी र प्रशासनको योजना सुन्न चाहेको बताएका थिए । नागरिकता र पासर्पोटका सिफारिस देखि जातजाति प्रमाणित सम्मका बिषय सार्वजनिक सुनुवाईका क्रममा उठेका थिए । बिभिन्न पालिकाका वडाध्यक्षहरु समेत सहभागी कार्यक्रममा सहभागीले बैबाहिक अंगिकृत नागरिकता प्रदानका प्रकृया,बाबुको ठेगान नलागेका बच्चाको जन्मदर्ता र नागरिकता प्राप्तिका प्रकृया,श्रीमतिको नाम लेख्नुपर्ने ठाउँमा पासर्पोट सिफारिसमा बाबुको नाम लेखिएको बिषय,बनि सकेको पासर्पोट बितरण प्रकृयालाई अझै खुकुलो बनाउने प्रावधान देखि सरकारी कार्यालयमा कार्यालय सहयोगी नियुक्तिमा मापदण्ड मिचिएको आशंका सहितका सवाल उठाएका थिए ।

सरकारी गाडीको डिकीमा किराना सामान बोकेको सम्म बिषयले सार्वजनिक सुनवाईका क्रममा स्थान पाएको थियो । नागरिकतासंग सम्वन्धित बिषय समेत रहेकोले उपस्थित पाथीभरा याङवरक गाउँपालिका अध्यक्ष केशरकुमार सुब्बा र फुङलिङ नगर उपप्रमुख भीमादेवी ओझाले आफुसंग सम्वन्धित बिषयबारे प्रष्ट्याउनु भएको थियो । प्रमुख जिल्ला अधिकारी चेम्जोङले सार्वजनिक सेवा प्रवाहमा सेवाग्राहीले औंल्याएका समस्या,पोखेका गुनासा र दिएका उपयुक्त सुझावलाई कार्यान्वयन प्रकृयामा क्रमशःउपयोग गर्दै लैजाने बताउनुभयो । सेवा बितरण थप प्रभावकारी बनाउन सार्वजनिक सुनुवाई कार्यक्रम मार्गर्दशनको रुपमा रहने उहाँको भनाई थियो ।

जिल्ला प्रशासन कार्यालयकोतर्फबाट प्रजिअ चेम्जोङ,सहायक प्रमुख जिल्ला अधिकारी टंकबहादुर भट्टराई,नायव सुब्बाद्धय रमेशप्रसाद सिग्देल र कुलमणि दाहाल जवाफदेहि हुनुहुन्थ्यो । जिल्ला प्रहरी प्रमुख(डिएसपी)राजन लिम्बूले सुरक्षा सम्बेदनशिलता,ट्राफिक व्यवस्थापन,सरकारी गाडी दुरुपयोग नियन्त्रण र नियमन देखि क्षमता भन्दा बढी यात्रु बोक्ने र सवारी नियम उल्लंघन गर्ने सवारी नियन्त्रणका बिषयमा उठेका सवालको जवाफ दिनु भएको थियो ।