इन्द्रेणी टिम ताप्लेजुङको पहिरो प्रभावित क्षेत्र मेहेलेमा,४ लाख २० हजार रुपैयाँ सहयोग
ताप्लेजुङ,असार १४ । कलाकार कृष्ण कडेंल नेतृत्वको इन्द्रेणी टोली सहयोग रकम समेत लिएर ताप्लेजुङको पहिरो प्रभावित क्षेत्र सिदिङ्वा गाउँपालिका पुगेको छ ।
सिदिङ्वा गाउँपालिका वडा नं ६ मेहेले र वडा नं ३ आङ्खोपका पहिरो पीडित १३ घर परिवारलाई इन्द्रेणी टोली ४ लाख २० हजार रुपैयाँ हस्तान्तरण गरेको कडेंलले जानकारी दिनुभयो । यो टोलीले मेहेलेका पहिरो प्रभावित बासिन्दाहरुसंग साक्षात्कार समेत गरेको स्थानीय राजेश कडेंलले बताउनुभयो । यसअघि ताप्लेजुङ सरोकार केन्द्रको समन्वयमा इन्द्रेणीको कार्यक्रम रेकर्डिङ स्थल काठमाडौंमा बाढी पहिरो पीडितको सहयोगार्थ सांगीतिक कार्यक्रम समेत भएको थियो ।
गत असार २ र ४ गतेको बाढी र पहिरोबाट ताप्लेजुङको सिदिङ्वा,सिरिजङ्गा,आठराई त्रिबेणी,मेरिङदेन,मैवाखोला,पाथीभरा याङ्वरक गाउँपालिकाका बिभिन्न क्षेत्र बाढी र पहिरोबाट प्रभावित छन् । सिदिङ्वाको मेहेलेमा बाबुछोरा सहित ३ जनाको मृत्यु भएको छ भने एकाघरका ३ जना बेपत्ता छन् । पहिरोले बगाएको ७ दिन सम्म पनि बेपत्ता परिवारका सदस्य पत्ता नलागेपछि भेटिने आसा गुमाएका मेहेले भालुखोपका यादव बुढाक्षेत्रीको घरपरिवारले श्रीमति भगिमायाँ,बुहारी सन्ध्या र नाति प्रज्जवलको शवको कुस बनाई दाहासंस्कार गरेर काजक्रिया थाल्नु भएको छ ।
