ताप्लेजुङमा एसईईको तयारी पूरा

-अनिता पन्दाक
ताप्लेजुङ, चैत १६ । ताप्लेजुङमा शुक्रबार भोलिदेखि सुरु हुने माध्यमिक शिक्षा परीक्षा (एसईई) को तयारी पूरा भएको छ । शिक्षा विकास तथा समन्वय इकाइ ताप्लेजुङका अनुसार विभिन्न सोह्र वटा केन्द्रमा सञ्चालन हुने एसईईको सम्पूर्ण तयारी पूरा भएको हो ।
जिल्लामा परीक्षा सञ्चालन गर्न निर्धारण भएका १६ वटै केन्द्रमा एसईईका लागि प्रश्नपत्र र उत्तरपुस्तिका पुगिसकेको जिल्लास्तिथ शिक्षा विकास तथा समन्वय इकाइ प्रमुख योगेश्वर भट्टराईले जानकारी दिनुभयो । प्रमुख भट्टराईका अनुसार परीक्षा गराउने केन्द्राध्यक्षहरुलाई मङ्गलबार अभिमुखीकरण गराइएको थियो । अभिमुखीकरणपछि केन्द्राध्यक्षहरुलाई प्रश्नपत्र र उत्तरपुस्तिका दिएर पठाइएको उहाँले बताउनुभयो ।
बिहीबार बिहान सम्ममा सबै केन्द्राध्यक्षहरु आ–आफ्नो केन्द्रमा पुगेसँगै सम्बन्धित केन्द्रमा परीक्षार्थी बस्ने ठाउँ (सिट) व्यवस्थापनको कार्य भइरहेको पनि इकाइ प्रमुख भट्टराईले जानकारी दिनुभयो । यसवर्ष फुङ्लिङ नगरपालिकामा भानुजन माध्यमिक विद्यालय, युवावर्ष माध्यमिक विद्यालय, जनता माध्यमिक विद्यालय, बाल सुबोधिनी संस्कृत माध्यमिक विद्यालय र सिद्धकाली माध्यमिक विद्यालयमा परीक्षा केन्द्र निर्धारण गरिएको छ ।
यस्तै पाथीभरा याङ्वरकको थेचम्बु माध्यमिक विद्यालय, सिदिङ्वा गाउँपालिकाको भञ्ज्याङ माध्यमिक विद्यालय, सिरिजङ्घा गाउँपालिकाको सिनाम माध्यमिक विद्यालय, तेल्लोक माध्यमिक विद्यालय र गणेश माध्यमिक विद्यालय केन्द्र रहेको छ । आठराई त्रिबेणी गाउँपालिकाको दुर्गा माध्यमिक विद्यालय र सरस्वती माध्यमिक विद्यालय, मिक्वाखोला गाउँपालिकाको मोति माध्यमिक विद्यालय, मेरिङ्देन गाउँपालिकाको त्रिभुवन माध्यमिक विद्यालयमा परीक्षा केन्द्र तोकिएको छ ।
यसैगरी मैवाखोला गाउँपालिकाको मैवाखोला माध्यमिक विद्यालय र फक्ताङ्लुङ गाउँपालिकाको सिँवा माध्यमिक विद्यालयमा केन्द्र निर्धारण गरिएको छ । उक्त केन्द्रहरुमा परीक्षा सञ्चालनका लागि सम्बन्धित विद्यालयका प्रधानाध्यापकलाई केन्द्राध्यक्ष तोकिएको शिक्षा विकास तथा समन्वय इकाइले जनाएको छ ।
इकाइ प्रमुख भट्टराईकाअनुसार १४ वटा परीक्षा केन्द्रमा सहायक केन्द्राध्यक्षसमेत तोकिएको छ । युवावर्ष मावि र गणेश मावि दुई केन्द्रमा भने ७५ जनाभन्दा कम परीक्षार्थी भएकाले सहायक केन्द्राध्यक्ष नखटाएको उहाँले जानकारी दिनुभयो ।
यता यसवर्षको एसईईमा जिल्लामा दुई हजार १२१ जना परीक्षार्थीले सहभागिता जनाउने भएका छन् । उक्त सङ्ख्यामध्ये नियमिततर्फ एकहजार ९५२, ग्रेडवृद्धि तर्फका ६६ र प्राविधिक धारतर्फका १०३ जना परीक्षार्थी रहेका शिक्षा विकास तथा समन्वय इकाइले जनाएको छ ।