शिक्षक विवादले पढाइ प्रभावित

उज्यालो पोष्ट
ताप्लेजुङ, फागुन १ । ताप्लेजुङको सिदिङ्वा गाँउपालिकाको एक विद्यालयमा विषय शिक्षक व्यवस्था नहुँदा पढाइ प्रभावित हुँदै आएको छ । सिदिङ्वा गाँउपालिका–४ साब्लाखुस्थित सरस्वती माध्यमिक विद्यालयमा गणित विषयको शिक्षक नहुँदा विगत दुई वर्षयता पढाइ प्रभावित हुँदै आएको हो ।
प्रस्तावित माध्यमिक विद्यालयको रुपमा सञ्चालित उक्त विद्यालयमा करिव दुई वर्षदेखि गणित विषयका शिक्षक नहुँदा पठनपाठन प्रभावित हुँदै आएको हो । विषय शिक्षक नभएकै कारण कक्षा ६–८ को अनिवार्य गणित र कक्षा ९ र १० को अनिवार्य तथा ऐच्छिक गणित विषयको पढाइ प्रभावित हुँदै आएको विद्यालयकी प्रधानाध्यापक सलिना तामाङले बताउनुभयो ।
प्रधानाध्यापक तामाङका अनुसार तत्कालीन विषय शिक्षक शान्तिराम मिश्रलाई विद्यालय व्यवस्थापन समितिले बरखास्त गरेपछि रिक्त रहेको ठाउँमा शिक्षक पदपूर्ति नहुँदा पढाइ प्रभावित भएको हो । निम्न माध्यमिक तहका करार (राहत) दरबन्दीका शिक्षक मिश्रलाई विद्यालयमा अनुपस्थित रहेको साथै उपस्थित भएर पनि अध्यापन नगरेको, पटकपटक कमजोरी गरेपछि सच्चिनलाई समय दिँदा पनि नसच्चिएको आरोपमा गत २०७८ चैत ५ गते समितिले बरखास्त गरेको थियो ।
शिक्षक पदबाट बरखास्त गर्नुभन्दा एक वर्ष अघि अर्थात २०७७ सालदेखि नै मिश्र विद्यालय नजाने र नपढाउने गरेकाले बरखास्त गरिएको विद्यालय व्यवस्थापन समितिका अध्यक्ष तेजबहादुर लिङ्देनले जानकारी दिनुभयो । लिङ्देनले शैक्षिक सत्र २०७८ मा वर्षभरिमा ११ दिन मात्र विद्यालयमा उपस्थित भएका र उपस्थित भएको दिनमा पनि विद्यार्थी नपढाएको बताउनुभयो । उहाँका अनुसार तत्कालीन शिक्षक मिश्रलाई बरखास्त गर्नुअघि एक वर्ष र बरखास्त गरेपछि एकवर्ष गरी दुई वर्षयता विद्यालयको पढाइ प्रभावित हुँदै आएको छ ।
मिश्रको बरखास्तीपछि रिक्त रहेको पदमा समयमै शिक्षक पदपूर्ति गर्नेगरी प्रक्रिया अघि बढाएको भए पनि गाउँपालिकाका वर्तमान नेतृत्वका कारण अहिलेसम्म पूरा हुन नसकेको विद्यालयले जनाएको छ । विद्यालयले पछिल्लो अवस्थाबारे सदरमुकाम फुङ्लिङमा आएर सोमबार पत्रकार सम्मेलन गर्दै गाउँपालिका नेतृत्वका कारण पढाइ तहसनहस भएको आरोप लगाएको छ ।
शिक्षक पदपूर्तिका लागि विज्ञापन खुलाउने सम्बन्धित गाउँपालिका शिक्षा शाखा र जिल्लास्थित शिक्षा विकास तथा समन्वय इकाइमार्फत आवश्यक प्रक्रिया पूरा गरी विज्ञापन खुलाए पनि पालिका नेतृत्वले रोकेका कारण हालसम्म पदपूर्ति हुन नसकेको हो । विज्ञापनमार्फत परीक्षा गराएर शिक्षक पदपूर्ति गर्नेतर्फ गाउँपालिकाले सहयोग गर्नुको सट्टा दरबन्दी नै कटौती गरी बरखास्त गरिएका शिक्षक मिश्रलाई अन्यत्र पदस्थापन गरेको विद्यालय व्यवस्थापन समितिका सदस्य मनकुमार लिङ्देनले बताउनुभयो ।
सदस्य लिङ्देनले गाउँपालिका नेतृत्व वा अध्यक्ष मानबहादुर राईको एकल हस्तक्षेपमा अबैधानिक र गैरकानुनी रुपमा मिश्रलाई पदस्थापनको लागि गरिएको प्रक्रियाविरुद्ध आफूहरुले सदरमुकामसम्म आएर पत्रकार सम्मेलन गर्नुपरेको बताउनुभयो । विद्यार्थीको पढाइमाथि खेलबाड र उनीहरुको भविश्य नै बिगार्ने खालको पालिका अध्यक्ष राईले गरेको गैरकानुनी कार्य सच्याउनुपर्ने, साविक दरबन्दी कायम गरी शिक्षक व्यवस्था गर्न विद्यालयले माग गरेको छ । न्याय दिलाउने निकायबाट नै अवैध र गैरकानुनी कार्य हुनुले आफूहरु अन्यायमा परेकोभन्दै सहयोग गर्न विद्यालयले सबैसँग आग्रह पनि गरेको छ ।
गाउँपालिका अध्यक्ष राईले भने जीवन गुजारा चलाउँदै आएको जागिर खोस्नु ठीक नभएकाभन्दै पदस्थापनमा पहल गर्नुभएको बताइएको छ । पालिका उपाध्यक्ष कृष्णकुमारी कडरियाका अनुसार माघ अन्तिम साता सम्पन्न गाउँसभाले बरखास्त गरिएका शिक्षक मिश्रलाई पदस्थापनका लागि गाउँपालिकाले पहल गर्ने गरेको थियो । हाल पदस्थापन भइसकेको भन्ने विषयमा आफू अनविज्ञ रहेको उपाध्यक्ष कडरियाले बताउनुभयो ।
यता विषय शिक्षक नभएपछि दुई वर्षयता जनसङ्ख्या तथा अङ्ग्रेजी विषयका शिक्षकले कक्षा ६–८ को गणित विषयको अध्यापन गराउँदै आउनुभएको प्रधानाध्यापक तामाङले बताउनुभयो । त्यस्तै कक्षा ९ र १० को गणित ऐच्छिकसमेत विज्ञान विषयका शिक्षकले पढाई राख्नुभएको उहाँले जानकारी दिनुभयो । विद्यालयका अनुसार रिक्त पदमा पदपूर्ति गर्न खुलाएको विज्ञापनमा भने तीनजनाले आवेदन दिएका थिए । सो विद्यालयमा हाल एकसय ५४ जना विद्यार्थी अध्ययनरत रहेका बताइएको छ ।