लिम्बुवान मञ्चको आन्तरिक विवाद उत्कर्षमा

उज्यालो पोष्ट
ताप्लेजुङ, माघ २३ । संघीय लोकतान्त्रिक राष्ट्रिय मञ्चको आन्तरिक विवाद अझ उत्कर्षमा पुग्दै गएको छ । मञ्चका अध्यक्ष कुमार लिङ्देन संस्थागत नबनी एकलौटी निर्णयहरु गर्दै निरंकुश बन्दै गएको भन्दै सुरु भएको विवाद उत्कर्षमा पुगेको हो ।
विचार मिल्ने पार्टीहरुसँग एकता, बिधानबमोजिम नियमित बैठक नराखेको र मञ्चले गरेको आन्दोलनको उद्देश्यविपरीत नेतृत्व लिङ्देन लागेको आरोप लगाउँदै बरिष्ठ उपाध्यक्ष ज्ञानबहादुर गुरुङ र महासचिव अशोक चेम्जोङ समूहले छुट्टै गतिविधि सुरु गरेका छन् । अध्यक्ष लिङ्देन र गुरुङ–चेम्जोङ पक्षको विवादको असर तल्लो तह (कमिटी) सम्म देखिएको छ
सम्भावित मतभेद र विवादलाई निरुपण गर्नका लागि मञ्चको बैठक, समीक्षा, छलफल राख्न अध्यक्षसमक्ष अनुरोध गर्दा पनि सुनुवाइ नभएको गुरुङ–चेम्जोङ पक्षको आरोप छ । निर्वाचनपछि राष्ट्रिय जनमुक्ति पार्टीले पठाएको एकता प्रस्तावको बिषय र निर्वाचन समीक्षा बैठक राख्न पटक–पटक अनुरोध गर्दासमेत लिङ्देनले बैठक नराखेको गुरुङ–चेम्जोङ पक्षको भनाइ छ ।
पार्टीभित्र देखिएको सबैखाले समस्याहरु बैठक राखेर छलफलमार्फत टुंग्याउनुपर्नेमा यसबारे बेवास्ता गरिएको गुरुङ–चेम्जोङ पक्षको भनाइ छ । लिङ्देनले आफू अल्पमतमा पर्छु भन्ने भयका कारण बैठक नबोलाएको पनि गुरुङ–चेम्जोङ पक्षले आरोप लगाएको छ । बैठक राख्नु र समस्या समाधानको निकास खोज्नुको सट्टा उल्टै गुरुङ–चेम्जोङ पक्षका आठ जना नेतालाई विज्ञप्तिमार्फत कारबाही गरिएको घोषणा गरेका थिए ।
अध्यक्ष लिङ्देनको उक्त कदमपछि गुरुङ–चेम्जोङ पक्षले बैठक बसेर घोषित कारबाही फिर्ता लिन र मञ्चको केन्द्रीय बैठक राख्न समयसीमा (अल्टिमेटम) दिएको थियो । अल्टिमेटम अवधिभित्र अध्यक्ष लिङदेनबाट कारबाही फिर्ता र बैठकको कुनै लिन पहल नभएपछि गुरुङ–चेम्जोङ पक्षाले नै सोमबार (माघ २२ गते) विज्ञपति प्रकाशित गरी बिधानविपरीत भएको कारबाही खारेज गरेको घोषणा गरिएको छ । यता केन्द्रीय बैठक राख्न दिएको ३५ दिने अल्टिमेटम भने कायम रहेको जनाइएको छ ।