| | |

एसईईका जिल्ला प्रथम विद्यार्थीलाई प्याव्सनद्वारा सम्मान

उज्यालो पोष्ट
ताप्लेजुङ, पुस २४ । ताप्लेजुङमा २०७८ सालको एसईईमा जिल्ला प्रथम हुने विद्यार्थीलाई सम्मान गरिएको छ । निजी तथा आवासीय विद्यालय अर्गनाइजेसन नेपाल (प्याव्सन) ताप्लेजुङले ३२ औं स्थापना दिवसको अवसरमा एसईईमा प्रथम हुने विद्यार्थीलाई नगदसहित सम्मान गरेको हो ।
प्याव्सनको ३२ औं स्थापना दिवसको अवसरमा आइतबार सदरमुकाम फुङ्लिङमा आयोजित कार्यक्रमकाबीच एसईईमा जिल्ला प्रथम हुन सफल रुपा गुरुङलाई पाँच हजार रुपियाँ नगदसहित सम्मान गरिएको हो । फुङ्लिङस्थित लिटलबुद्ध आवासीय बोर्डिङ स्कूलबाट २०७८ को एसईईमा सामेल भई ३.७० जीपीए ल्याएर गुरुङ जिल्ला प्रथम हुनुभएको हो ।
यस्तै दिवसकै अवसरमा लामो समयसम्म निरन्तर निजी विद्यालयमा शिक्षण पेसामा आवद्ध एक शिक्षकलाईसमेत सम्मान गरिएको प्याव्सन जिल्ला अध्यक्ष गणेश सिग्देलले बताउनुभयो । फुङ्लिङस्थित कञ्चन एकेडेमी बोर्डिङ स्कूलमा अध्यापनरत शिक्षक लक्ष्मी भट्टराईलाई नगदसहित कदरपत्रद्वारा सम्मान गरिएको अध्यक्ष सिग्देलले जानकारी दिनुभयो ।
प्याव्सन दिवसको अवसरमा सम्मानित हुने विद्यार्थी र शिक्षकलाई प्रदेश १ का प्रदेशसभा सदस्य खगेनसिंह हाङ्गाम र फुङ्लिङ नगरपालिकाका प्रमुख अमिर मादेनले सम्मान गर्नुभएको थियो । त्यस्तै दिवसकै अवसरमा फुङ्लिङ नगरपालिका–४ स्थित बालमन्दिर आधारभूत विद्यालयमा अध्ययनरत सुस्तश्रवण तथा फरक क्षमता भएका विद्यार्थीका लागि शैक्षिक सामग्रीसमेत उपलब्ध गराएको प्याव्सनका जिल्ला उपाध्यक्ष देवराज गुरुङले जानकारी दिनुभयो ।
यता विद्यार्थी, शिक्षक सम्मान तथा शैक्षिक सामग्री वितरणसँगै कार्यक्रममा शुभकामना आदान–प्रदानसमेत गरिएको थियो । दिवसका असरमा आयोजित कार्यक्रममा जिल्लास्थित राजनीतिक दलका प्रमुख, शैक्षिक संघ÷संस्थाका प्रतिनिधि, प्रमुख जिल्ला जिल्ला अधिकारी महेशकुमार पोखरेल लगायतले शुभकामना दिनुभएको प्याव्सनका जिल्ला सचिव तरुण भारतीले जानकारी दिनुभयो ।

Similar Posts