ताप्लेजुङकै जेठो सहकारीको आम्दानी घट्यो

खगेन्द्र अधिकारी
ताप्लेजुङ, पुस २२ । जिल्लाकै जेठो ताप्लेजुङ बहुउद्देश्य सहकारी संस्था लिमिटेडको आर्थिक वर्ष २०७८।७९ को आम्दानी सो भन्दा अघिल्लो आव भन्दा घटेको छ । संस्थाको २२ औं वार्षिक साधारणसभामा प्रस्तुत प्रतिवेदनअनुसार संस्थाको सञ्चालन बचत १ करोड १९ लाख ४५ हजार ९३८ रुपैयाँ रहेको छ ।
संस्थाका कोषाध्यक्ष खड्गबहादुर मोक्तानका अनुसार आव २०७८।७९ मा ८२ करोड ७३ लाख रुपैयाँ बराबरको कारोबार भएकोमा ५ करोड ४३ लाख १ हजार ९७२ रुपैयाँ सञ्चालन आम्दानी तथा ४ करोड २३ लाख ५६ हजार ३४ रुपैयाँ सञ्चाला खर्च भएको छ । बिगत वर्षको तुलनामा निक्कै कम कारोबार भएकोमा सोही अनुपातमा आम्दानी पनि घटेको संस्थाले जनाएको छ ।
आर्थिक वर्ष २०७७।७८ मा संस्थाले १ अर्ब ३४ करोड बराबरको कारोबार गरेको थियो । सो आवमा ३ करोड ६७ लाख ५१ हजार १६३ रुपैयाँ सञ्चालन आम्दानी गरेको थियो । तर, त्यतिबेला सञ्चालन खर्च पनि आम्दानीकै तुलनामा भएको पाइएको थियो ।

आय आर्जन नगर्ने सम्पत्ति नियन्त्रण गर्न लेखा समितिको सुझाव
संस्थाको लेखा समितिले आय आर्जन नगर्ने सम्पत्तिमा नियन्त्रण गर्न संस्थालाई सुझाव दिएको छ । लेखा समिति संयोजक तारानाथ बरालले लेखा समितिको प्रतिवेदन प्रस्तुत गर्दै गत आवको तुलनामा आय आर्जन नगर्ने सम्पत्तिमा केही नियन्त्रण भए पनि अझै घटाउन लेखा समितिकोतर्फबाट सुझाव पेश भएको जानकारी दिनुभयो ।
लेखा समितिले तरलता वृद्धि गर्न निक्षेप बढाउनुपर्ने, बीमा गराएर मात्र ऋण लगान गरी लगानी सुरक्षण गर्नुपर्ने, कार्यालयमा रहेका पुराना सामग्री मर्मतसम्भार गरेर प्रयोग गर्नुपर्ने र अनावश्यक सामान लिलाम गरी लिलाम नहुने समान धुल्याउनुपर्ने सुझाव दिएको छ ।
यस्तै खराब ऋणीको पहिचान गरी कानुनी परामर्शका आधारमा ऋण असुली प्रक्रिया आरम्भ गर्न, सहकारी शिक्षालाई ग्रामीण तह केन्द्रित गर्न, आय आर्जन नहुने सम्पतिको खरिदका लागि संस्थागत पुँजी परिचालनलाई न्यूनीकरण गर्न समेत सुझाइएको छ । यसअघि उद्घाटन कार्यक्रमलाई सम्बोधन गर्दै प्रमुख अथिति फुङ्लिङ नगरप्रमुख अमिर मादेनले सहकारीका सिद्धान्तलाई सहकारी संघ संस्थाहरुले अधिकतम् रुपमा प्रयोग गर्न सके शेयर सदस्यलाई त्यही अनुरुपको प्रतिफल प्राप्त हुने विश्वास लिनुभयो ।
सहकारीका ७ सिद्धान्त झल्कने ७ रंगका दीप प्रज्वलन गरी उहाँले साधारणसभाको उद्घाटन गर्नुभएको थियो । ऐच्छिक तथा खुल्ला सदस्यता, सदस्यद्वारा लोकतान्त्रिक नियन्त्रण, सदस्यको आर्थिक सहभागिता, स्वायत्तता र स्वतन्त्रता, शिक्षा, तालिम र सूचना, सहकारीबीच पारस्परिक सहयोग र समुदायप्रति चासो गरी सहकारीका ७ वटा सिद्धान्त छन् ।
कार्यक्रममा फुङ्लिङ नगर उपप्रमुख भीमादेवी ओझा, ताप्लेजुङ उद्योग बाणिज्य संघका बरिष्ठ उपाध्यक्ष दावा शेर्पा, जिल्ला सहकारी संघका उपाध्यक्ष चित्राकुमारी चंसु, पत्रकार महासंघका जिल्ला अध्यक्ष आनन्द गौतम लगायतको उपस्थिति रहेको थियो । ताप्लेजुङ बहुउद्देश्यीय सहकारी संस्था लिमिटेडका उपाध्यक्ष खगेन्द्रकुमार कार्कीले उपस्थित सबैलाई स्वागत गर्दै सहकारीका माध्यमबाट आयआर्जन वृद्धिमा सघाउ पुग्ने बताउनुभयो ।

जैविक मल उत्पादन संस्थाको प्रमुख प्राथमिकता
सहकारी संस्थाले जैविक मल उत्पादनलाई संस्थाको प्रमुख प्राथमिकतामा राखेको छ । संस्थाका अध्यक्ष टामन सिग्देलद्वारा प्रस्तुत वार्षिक प्रतिवेदनमा ताप्लेजुङस्थित कृषि ज्ञान केन्द्रको साझेदारीमा जैविक मल उत्पादनको प्रक्रिया आरम्भ गर्दै रासायनिक मल बिस्थापनको नीति अघि बढाउने उल्लेख गरिएको छ ।
यस्तै कृषि उत्पादन वृद्धिका लागि कम्तिमा ५० जना कृषकलाई फलफूल तथा तरकारी खेती सम्बन्धी अनुशिक्षण दिइने संस्थाले योजना बनाएको छ । यस्तै सामाजिक उत्तरदायित्व अन्तर्गत नेपाल नेत्र ज्योति संघ ताप्लेजुङसँगको साझेदारीका कार्यक्षेत्र भित्रको कुनै एक दुर्गम गाउँमा दुई दिने निःशुल्क आँखा शिविर सञ्चालन गर्ने संस्थाको योजना रहेको छ ।
संस्थाका सचिव तेजबहादुर भट्टराई खत्रीका अनुसार फुङ्लिङ नगरपालिकाका सबै ११ वटा वडा, फक्ताङ्लुङ गाउँपालिकाको वडा नं ३, ४ र ६, मिक्वाखोला गाउँपालिकाको वडा नं १ र २, मैवाखोला गाउँपालिकाको वडा नं ३ र ४, आठराई त्रिबेणी गाउँपालिकाको वडा नं ३,४ र ५ तथा पाथीभरा याङवरक गाउँपालिकाको वडा नं १ र ३ लाई संस्थाले आफ्नो कार्यक्षेत्र बनाएको छ । संस्थामा अहिले ३ हजार ६० जना शेयर सदस्य रहेका छन् ।