‘विचार मिल्ने दलहरुबीच तालमेल गर्न एमाले तयार’

–उज्यालो पोष्ट
ताप्लेजुङ, साउन २५ । नेपाल कम्युनिस्ट पार्टी एमालेका उपाध्यक्ष सुवासचन्द्र नेम्बाङले विचार मिल्नेहरुबीच आगामी निर्वाचनमा तालमेल गर्न आफ्नो पार्टी तयार रहेको बताउनुभयो । राजनीतिक मूल्य र मान्यतालाई आत्मसाथ गर्दै विचार मिल्ने दलसँग चुनावी तालमेल (गठबन्धन) गर्न एमाले तयार रहेको उपाध्यक्ष नेम्बाङले बताउनुभएको हो ।
बुधबार बिहान ताप्लेजुङ सदरमुकाम फुङ्लिङमा पत्रकारहरुसँग भेटघाट गर्दै नेता नेम्बाङले मिश्रित निर्वाचन प्रणालीमा कुनै एक दलले मात्र बहुमत ल्याउनसक्ने निश्चित नहुने हुँदा चुनावी तालमेल गर्नु अनौठो नभएको बताउनुभयो । उहाँले हालको सत्ता गठबन्धनजस्तो नभई राजनीतिक विचार मिल्ने दलसँग मात्र एमालेले चुनावी तालमेल गर्नसक्ने बताउनुभयो ।
उहाँले अहिलको सत्ता गठबन्धन विभिन्न विचार भएको दलहरुबीचको गठबन्धन भएकाले त्यसलाई ‘दूषित गठबन्धन’ को संज्ञा दिनुभयो । दूषित गठबन्धन भएकै कारण सत्ता गठबन्धनबीच नै संसदमा कुनैबेला सत्ता पक्ष र प्रतिपक्षको भूमिका देखिने गरेको उहाँको भनाइ छ । त्यस किसिमको अवस्थाबारे सचेत रहँदै पार्टीको नीति र योजनाअनुरुप आगामी संघ र प्रदेशको निर्वाचनमा विचार मिल्ने दलहरुबीच एमालेले गठबन्धन गर्न चाहिरहेको उहाँले बताउनुभयो ।
तत्कालीन संविधान सभाका अध्यक्षसमेत रहनुभएका एमाले उपाध्यक्ष नेम्बाङले आगामी निर्वाचनमा एमाले पहिलो दल हुनेगरी निर्वाचित लक्षित योजनामा जुटिसकेको बताउनुभयो । आफूसहित पार्टीका शीर्ष नेताहरु निर्वाचन लक्षित कार्यक्रममा जुटेको बताउँदै उहाँले देशभर जित्ने पात्रलाई संघ र प्रदेशको निर्वाचनमा उम्मेदवार बनाउने पार्टीको तयारी रहेको बताउनुभयो ।
यता प्रधानन्यायाधीस चोलेन्द्रसम्शेर जबराविरुद्ध वर्तमान गठबन्धन सरकारले पाँच महिनाअघि दर्ता गरेको महाअभियोगको छानबीन प्रक्रिया बल्ल सुरु हुने भएकाले छानबीन कार्यमा भने एमालेले सहयोग गर्ने बताउनुभयो । सरकारले सुटुक्कै छापामार शैलीमा महाअभियोग प्रस्ताव दर्ता गराएकाले सरकारको यो कार्य गलत भएको उहाँले बताउनुभयो । महाअभियोग प्रस्ताव एमालेको सहयोग बिना पास हुने स्थिति नरहेको पनि उहाँले स्पष्ट पार्नुभयो ।
एमाले जिल्ला कमिटीको आयोजनामा बुधबार फुङ्लिङमा हुने जिल्लास्तरीय कार्यकर्ता प्रशिक्षणमा उपाध्यक्ष नेम्बाङ, सचिव योगेशकुमार भट्टराई सहितका नेताहरु ताप्लेजुङ आउनुभएको हो । प्रशिक्षणमा अगुवा कार्यकर्ता, पार्टीका तर्फबाट स्थानीय तहमा निर्वाचित प्रमुख/उपप्रमुख वा अध्यक्ष/उपाध्यक्ष लगायत सहभागी हुने एमाले ताप्लेजुङका उपसचिव मणिशङ्कर पोमूले जानकारी दिनुभयो ।