आगलागीबाट वडा कार्यालय ध्वस्त, साढे नौ लाखको क्षति

–उज्यालो पोष्ट
ताप्लेजुङ, असार ६ । ताप्लेजुङको पाथीभरा याङ्वरक गाउँपालिका–५ चाक्सिबोटेको वडा कार्यालय आगलागीबाट ध्वस्त भएको छ । घर भाडामा सञ्चालन हुँदै आएको वडा कार्यालय आइतबार राति भएको आगलागीले ध्वस्त भएको हो ।
चाक्सिबोटेका वडाध्यक्ष रमेश खालिङ राईका अनुसार स्थानीय मानबहादुर राईको घरमा वडा कार्यालय भाडामा सञ्चालन हुँदै आएको थियो । आइतबार राति करिव ११ बजेतिर भएको आगलागीबाट वडा कार्यालयमा रहेको सबै सामग्री जलेर नष्ट भएको वडाध्यक्ष राईले जानकारी दिनुभयो ।
उहाँकाअनुसार कार्यालयमा रहेको कम्प्युटर, प्रिन्टर, दराज, कुर्सी लगायत सबै जिन्सी सामग्री जलेर खरानी भएको छ । उक्त आगलागी विद्युत सर्ट भएर भएको हुनसक्ने अनुमान गरिएको छ । यता आगलागी घटनापछि प्रहरीचौकी थुम्बेदिनबाट गएको प्रहरीटोली समेतले क्षतिको विवरण सङ्कलन गरेको बताइएको छ । सो आगलागीबाट वडा कार्यालय र घरधनीसमेतको गरेर नौ लाख ५० हजार रुपियाँ बराबरको क्षति हुन पुगेको प्रारम्भिक तथ्याङ्क निकालिएको प्रहरीले जानकारी दिएको छ ।
यता घरधनी राईको पनि घरभित्र रहेको सबै सामग्री जलेर नष्ट भएको छ । भुँइतलामा वडा कार्यालय र घरधनी राईको परिवार तलामाथि बस्दै आउनुभएको थियो । आगलागी सुरु हुनासाथ थाहा पाएकाले मानवीय क्षति हुन नपाएको पनि जिल्ला प्रहरी कार्यालयले जनाएको छ ।