सिरिजंघामा गठबन्धन, सिदिङ्वा र पाथीभरा याङ्वरकमा एमाले विजयी

–उज्यालो पोष्ट
ताप्लेजुङ, जेठ ३ । ताप्लेजुङको सिरिजङघा गाउँपालिकामा सत्ता गठबन्धनले विजयी हासिल गरेको छ भने सिदिङ्वा र पाथीभरा याङ्वरक गाउँपालिकामा एमाले विजयी भएको छ । सिरिजङघामा गठबन्धनको सेट तथा पाथीभरा याङ्वरकमा एमालेको सेट विजयी भएको हो ।
सिदिङ्वामा भने अध्यक्षमा एमाले तथा उपाध्यक्षमा नेकपा (माओवादी केन्द्र) उम्मेदवार भएका छन् । चुनावी परिणाम (नतिजा)अनुसार सिरिजङ्घा गाउँपालिकामा तीनहजार ३४३ मत ल्याएर लालकृष्ण चौहान अध्यक्ष पदमा निर्वाचित हुनुभएको हो । चौहान काँग्रेसबाट गठबन्धन तर्फका साझा उम्मेदवार हुनुहुन्थ्यो । एमालेका सन्तोषकुमार चाम्लिङ (तीनहजार २७५ मत) लाई पराजित गर्नुभएको हो ।
उपाध्यक्षमा पनि गठबन्धनकै साझा उम्मेदवार माओवादी केन्द्रका डा.चित्रकुमार माबो निर्वाचित हुनुभएको छ । माबोले तीनहजार ४६९ मत प्राप्त गर्नुभएको छ भने प्रतिद्वन्द्वी एमालेकी तुलासा बस्नेतले दुई हजार ३९० मत मात्र ल्याउनुभएको थियो ।
सिदिङ्वा गाउँपालिकामा तीनहजार ८५ मत ल्याएर एमालेका मानबहादुर राई अध्यक्षमा निर्वाचित हुँदा माओवादी केन्द्रकी नेतृ कृष्णकुमारी कडरिया (बन्दना) उपाध्यक्षमा निर्वाचित हुनुभएको छ । राईले गठबन्धनतर्फ काँग्रेसका प्रदिप राई (दुईहजार ३८२) लाई र कडरियाले आफ्ना प्रतिद्वन्द्वी स्वतन्त्र उम्मेदवार जीवनकुमार ताम्लिङलाई एक मतले पछि पार्दै निर्वाचित हुनुभएको हो । कडरियाको पक्षमा दुईहजार ३७६ मत रहेको थियो भने ताम्लिङले दुईहजार ३७५ मत पाउनुभएको थियो ।
पाथीभरा याङ्वरक गाउँपालिकामा दुईहजार ७७७ मत प्राप्त गरी एमालेका केशरकुमार सुब्बा अध्यक्षमा निर्वाचित हुनुभएको हो । उहाँले गठबन्धन तर्फका काँग्रेसका प्रत्यासी राम थेबेलाई पराजित गर्नुभएको हो । थेबेले दुईहजार ७४२ मत ल्याउनुभएको थियो । उपाध्यक्षमा पनि एमालेकै रनमाया गुरुङ तीनहजार १८६ मतका साथ विजयी हुनुभएको छ । माओवादी केन्द्रका कुमार सुब्बा लिम्बूले एकहजार ७९१ मात्र प्राप्त गर्नुभयो ।