ताप्लेजुङको मैवाखोलामा माओवादी केन्द्रका बिजयप्रकाश वनेम बिजयी,उपाध्यक्षमा काँग्रेस उम्मेदवार बिजयी

खगेन्द्र अधिकारी
ताप्लेजुङ,जेठ २ । ताप्लेजुङको मैवाखोला गाउँपालिकाको अध्यक्षमा गठबन्धनतर्फ माओवादीतर्फ केन्द्रका उम्मेदवार बिजयप्रकाश वनेम बिजयी हुनु भएको छ ।

२ हजार ६ सय ९ मत प्राप्त गर्दै उहाँ बिजयी हुनु भएको हो । एमाले किल्ला भनिदैं आएको मैवाखोलामा यसपटक गठबन्धनले किल्ला भत्काएको छ । वनेमले निवर्तनमान गाउँपालिका अध्यक्ष समेत रहनु भएका राजनकुमार थत्लुङलाइ पराजित गर्नुभयो । थत्लुङले २ हजार ५२ मत ल्याउनुभयो । उपाध्यक्षमा गठबन्धनतर्फ नेपाली काँग्रेसकी कमलकुमारी लिम्बू(असली) निर्वाचित हुुनु भएको छ । उहाँले २ हजार ५ सय ४१ मत ल्याउनुभयो । कमलकुमारीले निवर्तनमान उपाध्यक्ष कौशिला थत्लुङलाइ हराएर बिजय प्राप्त गर्नु भएको हो । थत्लुङले २ हजार १ सय १ मत ल्याउनुभयो । ६ वटा वडा रहेको मैवाखोलामा काँग्रेस र माओवादीले २–२ तथा एमाले र नेकपा एसले १–१ वटा वडाध्यक्ष जितेका छन् । गठबन्धन बिरुद्ध एमाले एक्लै चुनावी मोर्चामा रहेको थियो ।

मैवाखोला एमाले सचिव तथा पूर्वमन्त्री योगेशकुमार भट्टराईको गृह गाउँ हो । २०७४ सालको स्थानीय तहको निर्वाचनमा ३२ सदस्यीय गाउँसभा रहने यो गाउँपालिकाबाट अध्यक्ष,उपाध्यक्ष सहित ३२ मध्ये ३१ सभा सदस्य एमालेबाट निर्वाचित हुनु भएको थियो । ताप्लेजुङका ९ वटै स्थानीय तहमा काँग्रेस,माओवादी केन्द्र र नेकपा एस सहितका दलहरुको चुनावी तालमेल थियो । २ अध्यक्ष पद पाएको माओवादी केन्द्रले आफ्नो भागबण्डामा रहेका दुईवटै पालिकाका प्रमुख पद जितेको छ ।