पूर्वमन्त्री भट्टराईविरुद्ध उजुरी

–उज्यालो पोष्ट
ताप्लेजुङ, बैशाख २५ । ताप्लेजुङमा निर्वाचन आचारसंहिता उल्लङ्घन गरेकोभन्दै पूर्वमन्त्री एवम् एमाले सचिव योगेशकुमार भट्टराईविरुद्ध उजुरी परेको छ । निर्वाचनको मिति नजिकिँदै जाँदा मतदातालाई प्रभावित पार्ने खालको कार्य गरेकोभन्दै भट्टराईविरुद्ध मुख्य निर्वाचन अधिकृतको कार्यालयमा उजुरी परेको हो ।
भट्टराईविरुद्ध नेपाली काँग्रेस ताप्लेजुङका सचिव नन्दकुमार ओझाले मुख्य निर्वाचन अधिकृतको कार्यालयमा उजुरी दिनुभएको हो । ताप्लेजुङका प्रतिनिधिसभाका सांसदसमेत रहनुभएका भट्टराईले शनिबार फुङ्लिङ नगरपालिका–३ स्थित पालुङ्वाचौकमा मतदातालाई प्रभावित पार्ने गरी निर्वाचन आचारसंहिता विपरीत कार्य गरेकोभन्दै ओझाले उजुरी दिनुभएको छ ।
एमालेका तर्फबाट फुङ्लिङ नगरका प्रमुख (मेयर) पदका उम्मेदवार छत्रपति प्याकुरेल, वडाध्यक्ष पदका उम्मेदवार टंकबहादुर पालुङ्वासहितको उपस्थितिमा भट्टराईले स्थानीय जेष्ठ नागरिकलाई दोसल्ला ओढाउने र भोज खुवाउनेजस्ता कार्य गरेको उजुरीमा उल्लेख छ । निर्वाचन प्रचार-प्रसारको उक्त कार्य निर्वाचन आचारसंहिता २०७८ मा भएको व्यवस्थाविपरीत भएकाले आवश्यक कारबाहीको माग राखी ओझाले मुख्य निर्वाचन अधिकृतको कार्यालयमा उजुरी दिनुभएको हो ।
मुख्य निर्वाचन अधिकृतको कार्यालयका सहायक निर्वाचन अधिकृत पुष्पराज बाँस्तोलाले पूर्वमन्त्री भट्टराईसहित एमालेका नगरप्रमुख पदका उम्मेदवार प्याकुरेल र वडाध्यक्षका उम्मेदवार पालुङ्वासमेत तीनै जनाविरुद्ध उजुरी परेको जानकारी दिनुभयो । उजुरी दर्ता भएसँगै उहाँहरुलाई नेकपा एमाले जिल्ला पार्टी कार्यालयमार्फत सोमबार नै प्रतिवाद गर्न तीन जनाको नाममा पत्राचार गरिएको पनि बाँस्तोलाले बताउनुभयो ।
यसरी बैशाख ३० गते हुने स्थानीय तहको निर्वाचनको मिति नजिकिएसँगै जिल्लामा राजनीतिक दल तथा उम्मेदवारले चुनावी प्रचारलाई तिब्रता दिँदै आएका छन् । चुनावी प्रचारप्रसारको क्रममा केही–केही ठाउँमा निर्वाचन आचारसंहिता उल्लङ्घन हुने गरेको पाइएको छ । भट्टराईले भने जेष्ठ नागरिकलाई दोसल्ला ओढाएर सम्मान गर्दै गरेको तस्बिरहरु आफ्नो सामाजिक सञ्जाल फेसबुकमार्फत सार्वजनिक नै गर्नुभएको थियो ।
यता मुख्य निर्वाचन अधिकृतको कार्यालयले भने निर्वाचन आचारसंहितालाई अक्षरस पालना गर्न सम्बन्धित पक्षलाई अपिल गरिरहेको छ । आचारसंहिताको पालना भए नभएकोबारे सुक्ष्म अध्ययन तथा अनुगमन भइरहेको पनि मुख्य निर्वाचन अधिकृतको कार्यालयले जनाएको छ ।