उज्यालो पोष्ट दैनिक ‘ख’ वर्गमा

-उज्यालो पोष्ट
ताप्लेजुङ, माघ १६ । ताप्लेजुङको सदरमुकाम फुङ्लिङबाट प्रकाशित जिल्लाकै एकमात्र दैनिक पत्रिका उज्यालो पोष्ट दैनिक प्रेस काउन्सिल नेपालको वर्गीकरणमा पछिल्लो दुई वर्ष लगातार ‘ख’ वर्गमा परेको छ । प्रेस काउन्सिल नेपालले आइतबार सार्वजनिक गरेको आर्थिक वर्ष २०७५/७६ र २०७६/७७ को नतिजामा उज्यालो पोष्ट दैनिक दुवै वर्ष स्थानीय ‘ख’ वर्गमा परेको हो ।
२०७३ सालमा दर्ता भई सोही वर्षको अन्त्यतिरबाट प्रकाशन सुरु भएको उज्यालो पोष्ट दैनिक यसअघि पहिलो पटक आव २०७४/७५ मा प्रेस काउन्सिल नेपालको वर्गीकरणमा ‘ग’ वर्गमा परेको थियो । पत्रपत्रिका लगायत नेपाली सञ्चारमाध्यमको मूल्याङकन गर्ने निकाय प्रेस काउन्सिल नेपाल हो भने विगत दुई वर्षयता विश्व महामारीको रुपमा फैलिएको कोरोना भाइरस (कोभिड–१९) का कारण काउन्सिलले पनि आइतबार एकैचोटी दुई आवको नतिजा सार्वजनिक गरेको हो । कोभिड महामारीको प्रभावमा सबै क्षेत्र परिरहेको बेला यसबाट उज्यालो पोष्ट दैनिक पत्रिका पनि अछुतो रहेन ।
पत्रपत्रिकाजस्ता सञ्चारमाध्यमको विश्वसनीयता, सामग्रीको स्तरीयता, छपाई, वितरण व्यवस्था, आचारसंहिताको पालनासहितका सुचाङ्कका आधारमा प्रेस काउन्सिलले मूल्याङ्कन गर्ने गर्दछ । यसरी मूल्याङ्कन गरी काउन्सिलले पत्रपत्रिकालाई क, ख, ग र घ वर्गमा वर्गीकृत गर्दै आएको छ ।
यता वर्गीकरणमा परेका पत्रपत्रिकालाई सरकारले लोककल्याणकारी विज्ञापन उपलब्ध गराउने गर्दछ भने वर्गीकरणमा परेको वर्गका आधारमा विज्ञापन छपाई बापतको शुल्क सञ्चारमाध्यमहरुले पाउने गरेका छन् । यता तोकिएअनुसारको मापदण्ड नपु¥याउने पत्रपत्रिका वर्गीकरण प्रक्रियामै समावेश हुन पाउँदैनन् ।