एमाले ताप्लेजुङ जिल्ला अधिबेशन ः अध्यक्षका लागि ४ जना आकाँक्षी

खगेन्द्र अधिकारी
ताप्लेजुङ,पुस २० । पुस २३ र २४ गते हुने नेकपा एमाले ताप्लेजुङको ११ औं जिल्ला अधिबेशनमार्फत अध्यक्ष बन्न ४ जना आकाँक्षी देखिनु भएको छ ।

जिल्ला संयोजक तथा प्रदेश सांसद बलबहादुर साम्साहोङ,सहसंयोजक तथा संबिधानसभा सदस्य भूपेन्द्र थेबे,एमाले नेताद्धय केशरकुमार सुब्बा र राधाकृष्ण पौडेल आकाँक्षी हुनुहुन्छ । अर्का नेता सन्तोष खतिवडाले सहमति बनेको अवस्थामा आफु अध्यक्षको दौडमा नरहने बताउनु भएको छ । सुब्बा पाथीभरा याङ्वरक गाउँपालिका अध्यक्ष समेत हुनुहुन्छ । उहाँ एमालेको दशौं जिल्ला अधिबेशनमार्फत जिल्ला सचिवमा निर्वाचित हुनु भएको थियो । तत्कालिन नेपाल कम्युनिष्ट पार्टी(नेकपा)बिबाद तथा पछि एमाले र माओवादी केन्द्र फरक–फरक दलको हैसियतामा पुगेपछि बनेका दुई समानान्तर कमिटी मध्ये एक पक्षको उपाध्यक्ष पौडेल हुनुहुन्थ्यो । नेकपा र एमाले बिबाद कायम रहँदा अध्यक्ष केपी शर्मा ओली निकट रहेर थेबे अध्यक्ष,पौडेल उपाध्यक्ष र दीपेन्द्र पोमू(दीपेन)सचिव रहेको एमालेको एउटा कमिटी बन्यो । दशौं जिल्ला अधिबेशनबाट अध्यक्षमा निर्वाचत साम्सोहाङ,उपाध्यक्ष मातृकाप्रसाद भट्टराई,सचिव केशरकुमार सुब्बा र उपसचिव मंगलसिंह केदेम रहेको समिति अर्कोतर्फ क्रियाशिल थियो ।

बिबादका बीच दुई पार्टी कमिटी र दुई पार्टी कार्यालय रहेको एमाले ताप्लेजुङलाइ एक बनााउने प्रयास स्वरुप साम्सोहाङ संयोजक र थेबे सहसंयोजक रहने गरी दुबै कमिटीमा रहेका अन्य पदाधिकारी तथा माओवादी केन्द्र सहित अन्यबाट एमाले प्रवेश गरेका समेत समेटेर जिल्ला अधिबेशन नहुँदा सम्मका लागि ८ सदस्य सचिवालय बनाइएको छ । दुबै कमिटीमा रहेका सदस्यहरु जिल्ला सम्मेलन आयोजक कमिटीमा रहने गरी पार्टी कमिटी समायोजन गरिएपनि दुई पार्टी कार्यालय भने यथावत् चलिरहेका छन् । एमालेको नयाँ बिधान अनुसार कुनै एक कमिटीमा रहेको व्यक्तिले अर्को कमिटीमा रहने गरी उम्मेदवारी दर्ता गर्ने बित्तिकै साविकको कमिटीको हैसियत गुमाउने एमालेको नयाँ बिधानको व्यवस्था रहेको छ । सोहि अनुरुप जिल्ला कमिटीमा रहेका व्यक्ति पालिका कमिटीमा पनि आबद्ध भएको अवस्थामा जिल्ला कमिटीमा रहने छैनन् । एमाले ताप्लेजुङका इञ्चार्ज तथा पोलिटब्युरो सदस्य तिलकुमार मेन्याङ्वोले भने सहमतिमै नेतृत्व चयन गर्न बिभिन्न चरणमा नियमित छलफल भइरहेको तर निश्कर्षमा भने पुग्न नसकिएको जानकारी दिनुभयो ।‘सहमतिको प्रयास गरिरहेका छौं,हेरौं के हुन्छ’उहाँले भन्नुभयो ।