मतदाता नामावली संकलन बिशेष कार्यक्रममा ताप्लेजुङमा ३ हजार बढीले गराए नामदर्ता

खगेन्द्र अधिकारी
ताप्लेजुङ,पुस १२ । जिल्ला निर्वाचन कार्यालय ताप्लेजुङले सञ्चालन गरेको मतदाता नामावली संकलन बिशेष कार्यक्रमको पूर्ण अवधिमा ३ हजार बढीले नाम दर्ता गराएका छन् । यो अभियान अन्र्तगत दोस्रो चरणमा १ हजार ९ सय ५ जनाले नाम दर्ता गराएका छन् । पहिलो चरणमा १ हजार १ सय ५१ जनाले नाम दर्ता गरेका थिए ।

जिल्ला निर्वाचन कार्यालयका सूचना अधिकारी बान्दवराज(बिपिन)दुलालका अनुसार दोस्रो चरणमा बाह्य जिल्लाका ३ जनाले नाम दर्ता गराएका छन् । पहिलो चरणमा १ जनाले बाह्य जिल्ला नामावली दर्ता गरेका थिए । दुबै चरणमा गरी ३ हजार ५६ जनाले नाम दर्ता गराएको जिल्ला निर्वाचन कार्यालयले जनाएको छ । पहिलो चरण मंसिर १७ गतेबाट २६ गते सम्म र दोस्रो चरण मंसिर मंसिर २९ गतेबाट पुस ९ गते सम्म सञ्चालन भएको थियो । दोस्रो चरणमा पाथीभरा याङ्वरक गाउँपालिकामा ५ सय ११ जनाले, आठराइ त्रिबेणी गाउँपालिकामा ३ सय ५७ जनाले, सिरिजंगा गाउँपालिकामा ४ सय २६ जनाले र मेरिङ्देन गाउँपालिकामा १ सय ४१ जनाले मतदाता नामावलीमा आफ्नो नाम दर्ता गराएका छन् । यस्तै जिल्ला प्रशासन कार्यालयमा २ सय ३४ जना र जिल्ला निर्वाचन कार्यालयमा २ सय ३३ जनाले नाम दर्ता गराएको दुलालले जानकारी दिनुभयो ।

यसअघि पहिलो चरणमा अभियान सञ्चालन भएका मध्ये मैवाखोला गाउँपालिकामा ४ सय जनाले नामदर्ता गराएका थिए । त्यसपछि सिदिङ्वा गाउँपालिकामा ३ सय २० जना,जिल्ला प्रशासन कार्यालयमा १ सय ६८ जना,फक्ताङ्लुङ गाउँपालिकामा १ सय ३ जना,मिक्वाखोलामा ९३ जना र जिल्ला निर्वाचन कार्यालयमा ६६ जनाले नामदर्ता गराएका थिए । जिल्ला निर्वाचन कार्यालय र जिल्ला प्रशासन कार्यालयबाट नियमित रुपमै मतदाता नामावली संकलन भइरहेकोले फुङ्लिङ नगरपालिकामा भने मतदाता नामावली संकलन बिशेष कार्यक्रम सञ्चालन गरिएको थिएन । ति निकायबाट अहिले पनि मतादाता नामावली नाम दर्ताको कार्य भइरहेको जिल्ला निर्वाचन अधिकारी शकुन्तला राईले जानकारी दिनुभयो । ताप्लेजुङमा गत कात्तिक मसान्त सम्म ८६ हजार ९३ जना मतदाता रहेको जिल्ला निर्वाचन कार्यालयले जनाएको छ ।