बर्षदिनमै निर्माण सकेर सिरिजंगाद्धारा नवनिर्मित प्रमुख प्रशासकीय भवनबाट सेवा आरम्भ

खगेन्द्र अधिकारी
ताप्लेजुङ,मंसिर २९ । शिलान्यास गरेको ठ्याक्कै १ बर्षमै निर्माण कार्य पूरा गरी ताप्लेजुङको सिरिजंगा गाउँपालिकाले नवनिर्मित प्रमुख प्रशासकीय भवनबाट सेवा आरम्भ गरेको छ । २०७७ सालको सिरिजंगाको जयन्तीको अवसर पारी शिलान्यास गरिएको प्रशासकीय भवनबाट २०७८ सालको सिरिजंगा जयन्तीकै दिनदेखि सेवा आरम्भ गरिएको प्रमुख प्रशासकीय अधिकृत सन्तोष घिमिरेले जानकारी दिनुभयो । उद्घाटन कार्यक्रम भने केहि पछि गर्ने तयारी भइरहेको समेत घिमिरेले जानकारी दिनुभयो । मंसिर २९ गतेबाट त्यहाँ सिरिजंगा महोत्सव समेत गर्ने र सोहि अवसर पारेर प्रमुख प्रशासकीय भवन समेत उद्घाटन गर्ने कार्यतालिमा रहेपनि ओमिक्रोन संक्रमण सहितका अन्य प्राविधिक कुरालाइ ध्यानमा राखी तत्काल यि कार्यक्रम स्थगित गरिएको गाउपालिकाले जनाएको छ । किराँत लिम्बू लिपिका प्रचारक,सिरिजंगा लिपि र याक्थुङ संस्कृतिका प्रणेता,जातिय अस्थित्वका रक्षक,ज्ञानका पुञ्ज एवम् एक प्रकाण्ड बिद्धान मानिने तेअङ्सी सिरिजंगा सिंह थेबेको जन्म इ.सं १७०४ मंसिर २९ गतेका दिन सिरिजंगा गाउँपालिकाको केन्द्र तेल्लोकमा भएको मानिन्छ । उहाँकै सम्मानमा यो गाउँपालिकाको नाम सिरिजंगा राखिएको हो ।

स्थानीय प्रजातिका काठको प्रयोग गरी कलात्मक बुट्टा भरेर प्रमुख प्रशासकीय भवनका लागि आवश्यक पर्ने भौतिक सामग्री बनाइएको छ । अध्यक्षको टेबलमा सिरिजंगा लिपि कुँदिएको छ । उपाध्यक्षको टेवलमा न्यायको तराजु जनाउने चिन्ह र प्रमुख प्रशासकीय अधिकृतको टेवलमा निसान छाप कुँदिएको छ । स्थानीय सरकार सञ्चालन ऐन २०७४ अनुसार स्थानीय तहका उपप्रमुख÷उपाध्यक्ष न्यायिक समितिका संयोजक हुन्छन् । निसान छापले सरकारको प्रतिनिधित्व गर्छ । सरकारले तय,निर्धारण तथा निर्णय गरेका काम कर्तव्यको पालना कर्मचारीबाट हुने भएकोले प्रमुख प्रशासकीय अधिकृतको टेवलमा निसान छाप कुँदिएको पालिकाले जनाएको छ । कञ्चनजंघा र कुम्भकर्ण स्पष्ट देखिने प्रमुख प्रशासकीय भवनका प्रत्येक भागमा कलात्मक आवरण दिइएको छ । ८ वटा वडा रहेको सिरिजंगाका ६ वटा वडामा नयाँ प्रशासकीय भवन निर्माण कार्य सुरु भइसकेको र प्रत्येक भवनबाट कञ्चनजंघा र कुम्भकर्ण स्पष्ट रुपमा देखिने गरी संरचनाको डिजाइन गरिएको समेत सिरिजंगाले जानकारी दिएको छ । गाउँ कार्यपालिकाको प्रमुख प्रशासकीय भवन जस्तो प्रकृतिमा डिजाइन गरिएको छ,वडा प्रशासकीय भवन त्यहिँ प्रकृतिको तर सानो रुपको हुने प्रमुख प्रशासकीय अधिकृत घिमिरेले जानकारी दिनुभयो ।