शाक्यले बुझाउनुभयो राजीनामा,अर्को सरकार गठनको बाटो खुल्यो

काठमाडौं,कात्तिक १० । बागमती प्रदेशकी मुख्यमन्त्री अष्टलक्ष्मी शाक्यले प्रदेश प्रमुख यादव शर्मासमक्ष राजीनामा बुझाउनु भएको छ । बुधबार प्रदेशसभा बैठकमा सम्बोधन गरेर राजीनामा बुझाएको केही बेरमा प्रदेशप्रमुखको कार्यालय पुगेर उहाँले राजीनामा बुझाउनु भएको हो । १०९ सदस्यीय प्रदेशसभामा नेकपा एमालेको ५६ सांसद हुँदा भदौ २ गते एकल बहुमतको मुख्यमन्त्रीमा नियुक्त भएकी शाक्य पार्टी विभाजित भई नेकपा एकीकृत समाजवादी गठन भएपछि अल्पमतमा पर्नु भएको थियो । हाल प्रदेशसभामा एमालेको ४३ सांसदमात्र छन् । मुख्यमन्त्री शाक्यले राजीनामा बुझाएपछि बागमती प्रदेशमा अर्को सरकार गठनको बाटो खुलेको छ । नेपाली कांग्रेस, नेकपा माओवादी केन्द्र, नेकपा एकीकृत समाजवादी र जनता समाजवादी पार्टीको गठबन्धनले बागमती प्रदेशमा अर्को सरकार गठनको तयारी गरेका छन् । उनीहरुले एकीकृत समाजवादीको संसदीय दलका नेता राजेन्द्र पाण्डेलाई मुख्यमन्त्री बनाउने अनौपचारिक सहमति गरेका छन् । तर सहमति स्पष्ट भइसकेको छैन । नेपाली कांग्रेस बागमती प्रदेश संसदीय दलका नेता इन्द्रबहादुर बानियाँले प्रदेश प्रमुखले अर्को सरकार गठन गर्न दिएको समयभित्रै गठबन्धनबाट मुख्यमन्त्रीमा दावी पेश गर्ने बताउनुभयो ।