सुपर काबेली ‘ए’ आयोजना निर्माणको तयारी

–राजकुमार गुरुङ
ताप्लेजुङ, भदौ १५ । ताप्लेजुङमा सुपर काबेली ‘ए’ जलविद्युत आयोजना निर्माणको तयारी सुरु गरिएको छ । जिल्लाको पूर्वी सिरिजङ्घा गाउँपालिका भई बग्ने काबेली खोलाबाट उक्त जलविद्युत आयोजना निर्माणको तयारी गरिएको हो ।
सिरिजङ्घा गाउँपालिका–७ खेबाङ र वडा नं. ८ याम्फुदिनको सिमाना भई बग्ने काबेली खोलाबाट १३.५ मेगावाट क्षमताको विद्युत उत्पादन गर्नेगरी स्नो रिभर्स प्रालिले सुपर काबेली ‘ए’ जलविद्युत आयोजना निर्माणको तयारी थालेको हो । आयोजना निर्माणको तयारी थालेसँगै स्नो रिभर्स प्रालिले तयार पारेको आयोजनाको वातावरणीय प्रभाव मूल्यकाङ्कन (ईआईए) प्रतिवेदन ऊर्जा जलस्रात तथा सिँचाइ मन्त्रालयले गएको असार पहिलो सातामा स्वीकृत पनि गरिसकेको छ ।
उक्त आयोजनाबाट उत्पादित विद्युत १३२ केभीको स्विचयार्डमा जडान गरी नेपाल विद्युत प्राधिकरणको राष्ट्रिय प्रसारण लाइनको पाँचथर जिल्लास्थित अमरपुर सबस्टेशनमा जडान गरिने आयोजना सञ्चालक संस्था स्नो रिभर्स प्रालिले जनाएको छ । प्रालिका अनुसार आयोजनाको खेबाङ–याम्फुदिन क्षेत्रमा रहने विद्युत गृहदेखि १८ किमी लामो प्रसारण लाइनमार्फत १३२ केभीको अमरपुर सबस्टेशनमा उत्पादित विद्युत जडान हुने छ । आगामी २०८० साल बैशाखभित्र आयोजना निर्माण सम्पन्न गर्ने पनि प्रालिले लक्ष्य राखेको छ ।
यता ऊर्जा जलस्रोत तथा सिँचाइ मन्त्रालय, विद्युत विकास विभागले सार्वजनिक सूचना जारी गर्दै स्नो रिभर्स प्रालिद्वारा प्रस्तावित उक्त आयोजना निर्माण तथा सञ्चालन गर्दा पर्ने असरका विषयमा प्रभावित क्षेत्रका सरोकारवालासँग राय सुझाव मागेको छ । विभागले आइतबार सूचना जारी गर्दै आयोजना सञ्चालनबाट प्रतिकूल असर पर्ने भएमा सरोकारवालाले आफ्नो लिखित राय सुझाव ३५ दिनभित्र विभागसमक्ष पेश गरिसक्नुपर्ने जनाएको छ ।
ताप्लेजुङ अन्तर्गत नै काबेली खोलाबाट विद्युत उत्पादन गर्नेगरी काबेली ‘ए’ ३४ मेगावाट, अपर काबेली २३ मेगावाट र सुपर काबेली २० मेगावाट र अपर काबेली–२ १० मेगावाट क्षमताका आयोजनाहरु प्रस्ताव गरिएका छन् । ताप्लेजुङ–पाँचथर क्षेत्रमा पर्ने २५ मेगावाट क्षमताको काबेली ‘बी–१’ आयोजना भने यसअघि नै निर्माण सम्पन्न भई हाल सञ्चालनमा रहेको छ ।