प्रदेश १ को बजेटको बुँदा नं १५० को दोस्रो खण्ड बिबादमा,‘प्रदेशका कर्मचारी खाजा खाने,संघका मुख मिठ्याउने’

ताप्लेजुङ,असार २ । प्रदेश १ सरकारले आगामी आर्थिक बर्ष २०७८।०७९ का लागि असार १ मा प्रस्तुत गरेको बजेट बक्तब्यको बुँदा नं १५० को दोस्रो खण्ड सुरुमै बिबादमा परेको छ । बुदा नं १५० को दोस्रो खण्डले अनुत्पादक क्षेत्रमा करिव ११ करोड रुपैंया बढीको व्ययभार थपिएको भन्दै सामाजिक सञ्जालमा यसको तीव्र बिरोध हुन थालेको हो । बिराटनगरका पत्रकार गोकुल पराजुलीले‘कोरोनाकालमा बैठक भत्ता नलिने भन्दै मितब्ययी हुन खोजेको सरकारले प्रदेश १ का कर्मचारीलाइ खाजा भत्ताका नाममा ११ करोड खर्च गर्नेगरी बजेट ल्यायो । एउटै कार्यालयमा काम गर्ने प्रदेश अन्र्तगतका कर्मचारी खाजा खाने,संघका कर्मचारी मुख मिठ्याउने बस्ने’उहाँले टिप्पणी गर्नु भएको छ । प्रदेश १ सरकारका अर्थमन्त्री टंक आङ्बुहाङले असार १ मा प्रस्तुत गर्नु भएको बजेट बक्तब्यको बुदा नं १५० को दोस्रो खण्डमा प्रदेशका कर्मचारीको मनोबल,उत्प्रेरणा अभिबृद्धि गर्न प्रोत्साहन स्वरुप प्रदेश अन्र्तगतका कर्मचारीलाइ १ श्रावण २०७८ देखि लागु हुने गरी प्रत्येक कर्मचारीलाइ कार्यालयमा उपस्थित भएको दिन १ सय रुपैंयाका दरले खाजा खर्चको प्रवन्ध गरिएको उल्लेख छ । यो व्यवस्था एउटै कार्यालय र एउटै कार्यकक्षमा कार्यरत रहेपनि संघ अन्र्तगतका कर्मचारीलाइ भने लागु हुने हुने छैन । यसले बिभेद सृजना गरेको बिबाद हुन थालेको छ ।