प्रशिक्षक कोम्यान भन्छन् ः बार्सिलोनालाई लिग जित्न गाह्रो

म्याड्रिड,पुस १५ । बार्सिलोनाका प्रशिक्षक रोनाल्ड कोम्यानले आफ्नो क्लबलाई यस सिजनको स्पेनी ला लिग जित्न निकै गाह्रो हुने स्वीकार गरेका छन् । लिगमा मंगलबार कमजोर आइबरसँग १–१ को बराबरी खेलेपछि उनले यस्तो भनेका हुन् । यो बराबरीपछि बार्सिलोना अंक तालिकाका छैटौं स्थानमा छ र यो शीर्ष स्थानमा रहेको एट्लेटिको म्याड्रिडसँग सात अंकको दूरी हो । एट्लेटिकोले बार्सिलोनाको तुलनामा दुई खेल पनि कम खेलेको छ । चोटग्रस्ट लियोनल मेसीबिना मैदानमा उत्रेको बार्सिलोनाविरुद्ध किके गार्सियाको गोलमा आइबरले अग्रता लिएको थियो । खेलको ६७औं मिनेटमा ओसमन डेम्बेलेले बार्सिलोनाका लागि बराबरी गोल फर्काए । मंगलबार लिगमा भएका अन्य खेलमा काडिज र रियल भालाडोलिडले गोलरहित बराबरी खेले भने लेभान्टेले रियल बेटिसलाई ४–३ ले हरायो ।