डुम्रिसेमा पहिरोले घर भत्कायो
ताप्लेजुङ, साउन १२ । ताप्लेजुङको पाथीभरा याङ्वरक गाउँपालिकामा पहिरोले एक घर भत्काएको छ । सोमबार बिहान घर माथिदेखि झरेको पहिरोले पाथीभरा याङ्वरक गाउँपालिका–४ डुम्रिसेका सन्तोष तामाङको दुईतले घर भत्काएको हो ।
निरन्तरको वर्षाका कारण झरेको पहिरोले तामाङको घर भत्किँदा करिव तीन लाख रुपियाँ बराबरको धनमालको क्षति भएको जिल्ला प्रहरी कार्यालय ताप्लेजुङले जनाएको छ । बिहान ६ः३० बजेपछिको घटना भएकाले मानवीय क्षति भने हुन नपाएको ताप्लेजुङका प्रहरी प्रमुख प्रहरी नायव उपरीक्षक महेन्द्रकुमार श्रेष्ठले जानकारी दिनुभयो । प्रहरीका अनुसार पीडित परिवार अहिले छिमेकी जीतबहादुर तामाङको घरमा बस्दै आएका छन् ।
