आङ्खोपले जित्यो संघीय मेला भलिबल उपाधि

-उज्यालो पोष्ट
ताप्लेजुङ, पुस १९ । ताप्लेजुङको सिदिङ्वा गाउँपालिका–३ को आङ्खोप युवा क्लबले संघीय मेला भलिबल उपाधि जितेको छ । सिदिङ्वाकै वडा ६ को मेहेले किङलाई पराजित गर्दै आङ्खोपले उपाधि जितेको हो ।
उपाधि जितसँगै आङ्खोपले ८१ हजार रुपियाँ नगद पुरस्कारसिहत ट्रफी, पदक र प्रमाणपत्र पाएको छ । उपविजेता बनेको मेहेहे किङले ४१ हजार रुपियाँ नगदमा चित्त बुझाउनुपरेको छ । यस्तै आयोजक टोली तृतीय बन्दै १५ हजार रुपियाँ सान्तवना पुरस्कार पाएको छ ।
गएको मंगलबारदेखि सुरु भएको भलिबल प्रतियोगितामा १२ टोली सहभागी भएका थिए । प्रतियोगिता शुक्रबार सम्पन्न भएको हो । सिरिजंघा गाउँपालिका–२ आम्बेगुदिनको खाम्दिमेमा आयोजित संघीय मेलामा भलिबलसँगै नृत्य प्रतियोगितासमेत सम्पन्न भएको छ ।
नृत्य प्रतियोगितातर्फ भने स्थानीय डाँडागाउँ युवा क्लब विजेता र तेल्लोक स्पोर्टिङ क्लब उपविजेता बनेको आयोजक संघीय खेलकुद तथा साँस्कृतिक युवा क्लबका सल्लाहकार रक्की थेबेले जानकारी दिनुभयो । मेलामा राष्ट्रिय कलाकार प्रमोद खरेल, कुशल थलङ, दीपा सुहाङ, प्रितिका बेघा लगायतको सांगीतिक प्रस्तुति रहेको थियो ।